Հուլիսի 5-ին Եվրոլիգայի գավաթի խաղարկության որակավորման 1-ին փուլում մեր 3 ներկայացուցչից միայն Հայաստանի գավաթակիր «Շիրակին» հաջողվեց վստահ մեկնարկել ու արտագնա խաղում 1:0 հաշվով հաղթել Չեռնոգորիայի փոխչեմպիոն «Ռուդարին»: Ֆուտբոլ365-ի թղթակիցը «Շիրակի» գլխավոր մարզիչ Վարդան Բիչախչյանին խնդրեց ներկայացնել մանրամասներ «Ռուդարի» հետ առաջին հանդիպման ընթացքից ու հուլիսի 12-ին Գյումրիում տեղի ունենալիք պատասխան խաղի նախապատրաստությունից.

«Մանրամասնորեն ուսումնասիրել էինք մրցակցի խաղաոճը, գիտեինք՝ ինչ մարտավարություն է նախընտրում սեփական հարկի տակ, եւ կարծում եմ, չսխալվեցինք: Հակառակորդը խաղաց հենց այն խաղը, որը սպասում էինք: Մենք փորձեցինք խաղալ այն մարտավարությամբ, որը կիրառում ենք մեր առաջնության վերջին հանդիպումների ժամանակ: Խաղասկզբում մրցակիցը ստիպեց մեզ մի փոքր ետ քաշվել ու սեղմվել մեր դարպասին, ու այդ ընթացքում որոշակի խնդիրներ ունեցանք: Ճիշտ է՝ 2-րդ հարկում մեր տղաները գերազանց խաղացին, սակայն «Ռուդարի» խաղացողները, որ հիմնականում բարձրահասակ էին, առաջին 25 րոպեներին մեր դարպասի մոտ երկար փոխանցումներով հաճախ էին պրոբլեմներ ստեղծում:

Սկսած 30-րդ րոպեից՝ մեր թիմի խաղաոճում որոշ ճշգրտումներ կատարեցինք, իսկ ընդմիջմանը ավելի հստակեցրինք տղաների հետագա անելիքները: Մի փոքր տարածությունը զիջեցինք հակառակորդին՝ շեշտը դնելով ավելի շատ հակագրոհների վրա, ու ինչպես հետագայում պարզվեց, ընտրած մարտավարությունը լիովին արդարացրեց իրեն: Տղաները մի շարք վտանգավոր հակագրոհներ ձեռնարկեցին, որոնցից մեկի ժամանակ Ֆոֆանա Բեկոյի հարվածից հետո անդրադարձ եղավ հորիզոնական դարպասաձողից, իսկ երկրորդի դեպքում, աջ եզրում Դիոպ Դամից ստանալով փոխանցումը,  Լամին Յորոն ներխուժեց տուգանային հրապարակ ու սուր անկյան տակ կարողացավ գնդակը ուղարկել մրցակցի դարպասը: Դրանից հետո էլ նպաստավոր մի քանի դրվագներում եզրափակիչ հարվածների հաջող չստացվելու պատճառով հաշվի մեջ եղած տարբերությունը չկարողացանք ավելացնել: 1-ին կեսում գոլ խփելու իրական մեկ հնարավորություն էլ տանտերերն ունեին, սակայն փայլուն խաղաց մեր դարպասապահը:

Ընդհանուր առմամբ շատ լարված ու կոշտ պայքարում ընթացած մրցավեճում («Շիրակի» ֆուտբոլիստներն ստացան 5, «Ռուդարինը»՝ 2 դեղին քարտ,- խմբ.) տղաները մեծ ծավալի աշխատանք կատարեցին. բնավորություն դրսեւորելով՝ արժանիորեն նորմալ արդյունք ապահովեցին: Շատ լավ հասկանում ենք, որ հուլիսի 12-ին Գյումրիում տեղի ունենալիք պատասխան խաղում շատ ավելի ծանր է լինելու: Մրցակիցն այլեւս կորցնելու ոչինչ չունի եւ մեծ ուժերով նետվելու է առաջ: Մենք էլ կփորձենք ավելի համարձակ, հավաքված ու կարգապահ գործել, ուշադիր լինել պաշտպանությունում, որպեսզի ապահովենք ցանկալի արդյունք: Մեկօրյա հանսգտից հետո՝ այսօր, կվերսկսենք մարզումները: Ժամանակ ունենք եւ լրջորեն ու մեծ պատասխանատվությամբ կպատրաստվենք:

Կազմի հետ կապված խնդիրներ չկան: Այսօրվանից թեթեւ մարզումները կվերսկսի Կարեն Ալեքսանյանը, սակայն ամենայն հավանականությամբ, նա դեռ պատրաստ չի լինի ու չի կարողանա մասնակցել նաեւ հուլիսի 12-ի հանդիպմանը»:

Տեղեկացնենք, որ «Շիրակ»-«Ռուդար» հանդիպումը կսկսվի հուլիսի 12-ին ժամը 18-ին Գյումրիի Քաղաքային մարզադաշտում:

Լուսանկարը՝ www.fcshirak.am-ի