Գյումրիի "Շիրակի" գլխավոր մարզիչ Վարդան Բիչախչյանը վաղը "Ռուդարի" հետ կայանալիք Եվրոպա լիգայի որակավորման առաջին փուլի խաղից առաջ պատասխանեց armsport.am-ի հարցերին:

- Այսօր "Շիրակը" վերջին մարզումն անցկացրեց խաղից առաջ: Ի՞նչ վիճակում է թիմը մոտենում վաղվա խաղին:

- Գիտեք, որ մեկ կորուստ ունենք. Կարեն Ալեքսանյանը վնասվածքի պատճառով չի ժամանել Մոնտենեգրո: Մյուս խաղացողները մարտական են տրամադրված ու պատրաստ են վաղը դուրս գալ խաղադաշտ ու պայքարել դրական արդյունքի համար:

- Նիկշիչում հաջողվե՞ց որևէ նոր բացահայտում կատարել "Ռուդարի" վերաբերյալ:

- Ոչ, քանի որ մրցակիցը թեթև մարզում անցկացրեց, ինչպես և մենք: Մինչ այս տեսել էինք նրանց մասնակցությամբ խաղերի տեսագրություններ ու գիտենք, որ ֆիզիկական լավ տվյալներով խաղացողներով են համալրված, ֆիզիկապես լավ են պատրաստված, բայց չի կարելի է ասել, որ նրանք միայն ֆիզիկականի վրա ենք ուշադրություն դարձնում: Ամեն դեպքում սարսափելի ոչինչ չկա ու մենք վաղը պայքարելու ենք լավ արդյունքի համար: Եթե տղաները ցույց տան իրենց կարողությունները, ապա խնդիրներ չենք ունենա:

- Հայաստանի առաջնության վերջին հանդիպումներում "Շիրակը" հարձակողական ֆուտբոլ է ցուցադրում ու հաղթանակներ տոնում: Վաղվա մրցավեճում և՞ս նույն մարտավարությամբ եք գործելու:

- Այո, շարունակելու ենք ցուցադրել հարձակողական ֆուտբոլ: Նույն մարտավարությամբ խաղալու ենք, բայց եթե խաղի ընթացքում խնդիրներ ունենանք, ապա գիտենք, թե ինչ փոփոխություններ պետք է կատարենք:

- Առաջին հանդիպմանը ինչպիսի՞ արդյունքը կգոհացնի Ձեզ:

- Գուշակություններ անել չեմ սիրում: Նվազագույն խնդիրը` գոլ բաց չթողնելն է: Եթե դարպասը կարողանանք անառիկ պահել, ապա ավելի լավ վիճակում կմոտենանք պատասխան խաղին, որը կայանալու մեր հարկի տակ: Կարևոր է, որ պատասխան խաղում հակառակորդը խորը պաշտպանության չանցնի ու խաղալու հնարավորություն ունենանք: