Գյումրիի "Շիրակն" այսօր ժամանեց Մոնտենեգրոյի Նիկշիչ քաղաք, որտեղ վաղը կայանալու է Եվրոպա լիգայի որակավորման առաջին փուլի "Ռուդարի" հետ մրցավեճը: Մոնտենեգրոյի 2-րդ քաղաքը հիշեցնում է նախկին Խորհրդային միությունը և դժվարությամբ կարելի է հավատալ, որ այն գտնվում է Եվրոպայում:

Գյումրեցիները մրցավայր ուղևորվեցին Երևան-Պոտգորիցա հատուկ չվերթով, ապա մայրաքաղաքից ավտոբուսով ուղևորվեցին Նիկշիչ: "Շիրակի" նախագահ Արման Սահակյանի գլխավորած պատվիրակությունը Նիկշիչում հանգրվանել է քաղաքի լավագույն հյուրանոցում' "Օնոգոստում", իսկ այսօր Երևանի ժամանակով 20:00-ին "Շիրակը" կանցկացնի իր միակ մարզումը Քաղաքային մարզադաշտում, որտեղ էլ վաղը կայանալու է հանդիպումը: Սպասվում է, որ մարզումից առաջ լրագրողների հարցերին պետք է պատասխանի "Շիրակի" գլխավոր մարզիչ Վարդան Բիչախչյանը:

Նիկշիչում եղանակը բավական շոգ է, թեև հնարավոր է երեկոյան տեղումներ լինեն:

Հիշեցնենք, որ "Շիրակի" մրցակիցը ներկայացնում է Պլևլյա քաղաք, որը միջազգային օդանավակայանից թույլատրելից ավելի հեռու է, ուստի թիմերը մրցելու են Նիկշիչում:

Հակոբ Բերբերյանը Մոնտենեգրոյում պատրաստել է առաջին լուսանկարների շարքը: Երեկոյան armsport.am-ում կարող եք դիտել Հայաստանի գավաթակրի մարզման լուսանկարները, իսկ վաղը առավոտյան կներկայացնենք Նիկշիչն armsport.am-ի աչքերով