"ՇԻՐԱԿ"-"ՈՒԼԻՍ"  24 խաղ, +4=5-15, 13:32
7 ապրիլի, ժ.16:00, Իջևան, "Արնար" մարզադաշտ

Ընթացիկ առաջնությունում երկրի չեմպիոն "Ուլիսը" 2-րդ անընդմեջ խաղն է անցկացնելու Իջևանում: Եթե "Գանձասարի" հետ մեկնարկային խաղում "Ուլիսը" դաշտի տիրոջ կարգավիճակով էր, ապա այս անգամ հյուրընկալվելու է  "Շիրակին", որի համար "Արնար" մարզադաշտը ժամանակավորապես սեփական հարկի է վերածվել: "Ուլիսը" չեմպիոնի կարգավիճակով դեռևս հաղթանակ չի տոնել, ուստի անպայման կձգտի հաջողության հասնել: Սակայն "Շիրակն" էլ հաղթանակով է մեկնարկել և կփորձի զարգացնել հաջողությունը: Այնպես որ համառ մրցավեճ է սպասում:

Ճիշտ է, ՀՀ առաջնություններում "Ուլիսը" զգալի առավելության է հասել շիրակցիների նկատմամբ: Արդեն 15 խաղ "Շիրակին" չի հաջողվում հաղթել "Ուլիսին": Այդ հանդիպումներից միայն 5-ն են ավարտվել ոչ-ոքի: Վերջին հաղթանակն "Ուլիսի" նկատմամբ "Շիրակը" տոնել է 2008թ. առաջին շրջանի խաղում: Թիմին հաղթանակ է պարգևել Անդրանիկ Բարիկյանի խփած միակ գոլը:

Նախորդ մրցաշրջանում էլ "Ուլիսի" առավելությունը զգալի էր, որը 4 հանդիպումներից 3-ում հաղթեց, մեկն ավարտեց ոչ-ոքի: Իջևանում կայացած առաջին շրջանի խաղը հոբելյանական էր "Շիրակի" համար' 500-րդը ՀՀ առաջնություններում: Գյումրեցիների համար հոբելյանն անհաջող ստացվեց: "Շիրակը" պարտվեց 1:3 հաշվով: Առաջին խաղակեսում ընդամենը 7 րոպեում ուլիսցի Գեորգի Կրասովսկին 2 անգամ գրավեց շիրակցիների դարպասը: Առաջին խաղակեսի ավարտին թեև Կարեն Ն. Խաչատրյանը կրճատեց հաշիվը, սակայն ընդմիջումից հետո Վալերի Ալեքսանյանը խփեց 3-րդ գոլը' արձանագրելով հանդիպման վերջնական արդյունքը: Երևանում էլ ուլիսցիներին հաղթանակ պարգևեց Արամ Բարեղամյանի խփած միակ գնդակը:

3-րդ շրջանի խաղում էլ հաջողությունն ուղեկցեց ուլիսցիներին, որոնք հաղթեցին Արտակ Գրիգորյանի և Ալբերտ Թադևոսյանի խփած գոլերի շնորհիվ: Եվ միայն 4-րդ շրջանի խաղում "Շիրակին" հաջողվեց մեկ միավոր վաստակել ուլիսցիների հետ մրցավեճում: Գրանցվեց մարտական ոչ-ոքի' 2:2: Աչքի ընկան թիմերի ռմբարկուներ Գեորգի Կրասովսկին ու Անդրանիկ Բարիկյանը' խփելով 2-ական գնդակ:

Իսկ ահա գավաթի մրցաշարում հաջողությունն ուղեկցեց "Շիրակին": Իջևանի "Արնար" մարզադաշտում կայացած գավաթի կիսաեզրափակիչ առաջին հանդիպման ելքը վճռեց ավելացված ժամանակի վերջին վայրկյաններին ուլիսցի Գևորգ Նռանյանի խփած միակ գոլը: Իսկ "Հրազդանում" կայացած պատասխան խաղում գյումրեցիները համոզիչ ռևանշի հասան: Հիմնական ժամանակում Հովհաննես Գրիգորյանը հավասարեցրեց 2 հանդիպումների ընդհանուր հաշիվը, իսկ լրացուցիչ ժամանակում Մկրտիչ Նալբանդյանը խփեց հաղթական գնդակը' եզրափակիչի ուղեգիր պարգևելով շիրակցիներին:

Մրցակիցների հանդիպումներում բոլորից արդյունավետն ուլիսցիներ Գոռ Աթաբեկյանն ու Գեորգի Կրասովսկին են, որոնք 4-ական գոլ են խփել: Շիրակցիներից 3-ական գոլի հեղինակ են դարձել Արտյոմ Բեռնեցյանը և Անդրանիկ Բարիկյանը: