"ՇԻՐԱԿ"-"ՄԻԿԱ"   9 խաղ, +2=2-5, 7:17

18 մարտի, ժ.15:00, Իջևան, "Արնար" մարզադաշտ

Գավաթի կիսաեզրափակիչ առաջին հանդիպումը պատվավոր մրցանակի խաղարկություններում մրցակիցների 10-րդ մրցավեճն է: Այդ հանդիպումներից ամենավճռորոշը կայացել է անցյալ տարվա մայիսի 11-ին գավաթի եզրափակիչում: "Շիրակը", որ Սամվել Պետրոսյանի գլխավորությամբ եզրափակիչի ճանապարհին պայքարից դուրս էր մղել գործող ու ապագա չեմպիոններ "Փյունիկին" (1:1, 1:0) և "Ուլիսին" (0:1, 2:0), վճռորոշ խաղում չկարողացավ լրջորեն դիմադրել "Միկային"' պարտվելով 1:4 հաշվով: Այդ խաղում արդեն 16-րդ րոպեին Ալեքսը բացեց հաշիվը' գրավելով Իգոր Լոգվինովի պաշտպանած դարպասը:

35-րդ րոպեին Նարեկ Բեգլարյանը 2-րդ գոլը խփեց: Ընդմիջման գնալուց 3 րոպե առաջ շիրակցի Անդրանիկ Բարիկյանը խփեց պատասխան առաջին գնդակը: Երկրորդ խաղակեսում Նարեկ Բեգլարյանն ու Դոնգ Ֆանգժուն ևս 2 անգամ գնդակն ուղարկեցին շիրակցիների դարպասը: Հաղթելով խոշոր հաշվով, "Միկան" 6-րդ անգամ նվաճեց Հայաստանի գավաթը: Գավաթի մրցաշարերում "Միկայի" և "Շիրակի" ճանապարհներն առաջին անգամ հատվել են 2002թ. խաղարկության քառորդ եզրափակիչում: Առաջին խաղում հյուրընկալվելիս "Շիրակը" հաղթեց խաղավերջում Կարեն Ալեքսանյանի խփած միակ գոլի շնորհիվ: Սակայն Գյումրիում "Միկային" հաջողվեց ռևանշի հասնել (2:1) ու կիսաեզրափակիչի ուղեգիր նվաճել: Թեև հաշիվը բացեց  շիրակցի Տիգրան Դավթյանը, սակայն մինչև ընդմիջում Դավիթ Գրիգորյանն ու Արմեն Շահգելդյանը առաջ մղեցին "Միկային"' ապահովելով կիսաեզրափակիչի ուղեգիրը:

Հաջորդ տարի վիճակահանությամբ մրցակիցները զույգեր կազմեցին կիսաեզրափակիչում: Այս անգամ էլ երկու խաղերի արդյունքով հաջորդ փուլ մտավ "Միկան": Գյումրիում դարպասները մնացին անառիկ, իսկ սեփական հարկի տակ "Միկան" 3 անպատասխան գնդակ խփեց ու եզրափակիչի ուղեգիր նվաճեց: Միկացիներից գոլերի հեղինակներ դարձան Արամ Ոսկանյանը (11մ), Մարատ Մկրտչյանն ու Դավիթ Գրիգորյանը:

Գավաթային հաջորդ մրցավեճը կայացավ 2007թ. քառորդ եզրափակիչում: Այս անգամ էլ "Միկան" առավելության հասավ գյումրեցիների նկատմամբ: Արդեն առաջին խաղում սեփական հարկի տակ 4:1 հաշվով հաղթելով, "Միկան" հաջորդ փուլի ուղեգրի լուրջ հայտ ներկայացրեց: "Միկայից" աչքի ընկան Ֆեռնանդո Տալեսը, Արմեն Պետիկյանը, Արմեն Շահգելդյանը  և Կլեբեր Լուիս Ռոդրիգեսը: Շիրակցիներից միակ գոլը խփեց Արարատ Հարությունյանը: Գյումրիում գրանցվեց ոչ-ոքի' 1:1: Շիրակցի Վարդան Բիչախչյանի խփած գոլին հյուրերը պատասխանեցին Կարեն Մուրադյանի անցկացրած գնդակով:

Գավաթի մրցաշարերում մրցակիցների հաջորդ հանդիպումը կայացել է 2009թ. քառորդ եզրափակիչում: Առաջին խաղում "Միկան" սեփական հարկի տակ 3:1 հաշվով հաղթանակ տոնեց: Հաշիվը բացեց Ուլիսես Մոնտենեգրոն, իսկ 2-րդ խաղակեսի սկզբում Գևորգ Հովհաննիսյանը հավասարեցրեց հաշիվը: Մինչև խաղավերջ Արա Հակոբյանն (11մ) ու Արամ Ոսկանյանը ևս 2 գոլ խփեցին: Գյումրիում "Շիրակը" հաղթեց Արա Մկրտչյանի խփած միակ գոլի շնորհիվ, բայց դա բավական չէր կիսաեզրափակիչ մտնելու համար:

Այսպիսով, գավաթի մրցաշարերում "Շիրակի" և "Միկայի" ճանապարհները 5 անգամ են հատվել ու բոլոր դեպքերում էլ հաջողությունն ուղեկցել է միկացիներին: Այդ հանդիպումներում "Միկայի" կազմում բոլորից արդյունավետ են գործել Նարեկ Բեգլարյանը, Դավիթ Գրիգորյանը, Արմեն Շահգելդյանը և Արամ Ոսկանյանը, որոնք խփել են 2-ական գոլ: Շիրակցիների կազմում մեկ գնդակից ավելի ոչ ոք չի խփել:

Գավաթի ընթացիկ խաղարկությունում, որի մեկնարկը տրվել էր անցյալ տարվա նոյեմբերին, "Միկան" քառորդ եզրափակիչում պայքարից դուրս էր մղել "Փյունիկին":  Նոյեմբերի 20-ին ֆուտբոլի ակադեմիայում կայացած խաղում դարպասները մնացել էին անառիկ: 4 օր անց "Հրազդանում" հյուրընկալելով "Փյունիկին", "Միկան" հաղթեց 3:1 հաշվով ու կիսաեզրափակիչի ուղեգիր նվաճեց: 2 անգամ աչքի ընկավ Գևորգ Պողոսյանը, մեկ գնդակ էլ "Փյունիկի" դարպասը խփեց Նարեկ Բեգլարյանը: Միայն խաղավարտից 6 րոպե առաջ փյունիկցի Արտակ Եդիգարյանին հաջողվեց "թրջել" հաշիվը:

"Շիրակը" քառորդ եզրափակիչում մրցեց "Բանանցի" հետ: Նոյեմբերի 20-ին "Շիրակը" մրցակցին հյուրընկալեց Իջևանի "Արնար" մարզադաշտում: Հաշիվը 56-րդ րոպեին բացեց շիրակցի Գևորգ Հովհաննիսյանը: Սակայն 2 րոպե անց Սարգիս Կարապետյանը վերականգնեց հավասարակշռությունը: Այնուամենայնիվ, "Շիրակը" կորզեց հաղթանակը: Խաղավարտից 2 րոպե առաջ հաղթական գոլի հեղինակ դարձավ Անդրանիկ Բարիկյանը: 4 օր անց "Բանանցի" մարզադաշտում կայացած խաղում դարպասները մնացին անառիկ:

"Միկան" գավաթի մրցաշարերի ամենահաջողակ թիմն է ու յուրօրինակ ռեկորդակիրը: 2000թ.-ից մասնակցելով պատվավոր մրցանակի համար մրցավեճին, "Միկան" մշտապես մտել է կիսաեզրափակիչ: 6 անգամ' 2000, 2001, 2003, 2005, 2006 և 2011թթ. "Միկան" հաջողությամբ հաղթահարել է կիսաեզրափակիչի արգելքը ու մտել է եզրափակիչ' նվաճելով մրցանակը:

Գավաթի մրցաշարերի անփոփոխ մասնակից "Շիրակը" 11-րդ անգամ է հանդես գալու կիսաեզրափակիչում: Գյումրեցիներին առայժմ միայն 4 անգամ' 1993, 1994, 1999 և 2011թթ. է հաջողվել եզրափակիչի ուղեգիր նվաճել: Առայժմ գավաթը նվաճելու "Շիրակի" բոլոր 4 փորձերն էլ անհաջողության են մատնվել:

Ինչպես հայտնի է, գավաթի այս տարվա եզրափակիչ հանդիպումն առաջին անգամ անցկացվելու է վերակառուցումից հետո իր հյուրընկալ դռները բացող Գյումրիի մարզադաշտում: Ինչ խոսք, դա շիրակցիների համար լրացուցիչ խթան է, որպեսզի ամեն ջանք ներդնեն հերթական արգելքը հաջողությամբ հաղթահարելու համար: