"ՇԻՐԱԿ”-"ԻՄՊՈՒԼՍ”       8 խաղ, +1=1-6, 10:15
5 մայիսի, ժ.17:00, Գյումրի, Քաղաքային մարզադաշտ

Ստացվել է այնպես, որ առաջնության հերթական տուրում Գյումրիում կրկին մրցավեճի են բռնվելու գավաթի եզրափակիչի մասնակիցները: Այնպես որ մեկ շաբաթվա ընթացքում մրցակիցները 2-րդ անգամ են հանդիպելու: Հետաքրքիր է, որ անցյալ տարի էլ նույնպիսի պատկեր էր "Շիրակի” և "Միկայի” դիմակայությունում: Միայն մեկ տարբերությամբ, որ սկզբում թիմերը մրցել էին ՀՀ առաջնությունում, որում հաջողությունն ուղեկցել էր "Շիրակին” (1:0), իսկ 4 օր անց վիճարկել էին Հայաստանի գավաթը:

Եթե գավաթի եզրափակիչում հաջողությունն ուղեկցեց շիրակցիներին, ապա առաջնության հանդիպումներում "Իմպուլսը” զգալի առավելության է հասել գյումրեցիների նկատմամբ: "Շիրակին” առայժմ միայն մեկ անգամ է հաջողվել հաղթել "Իմպուլսին”: Դա անցած մրցաշրջանի 2-րդ տուրի հանդիպումն էր, որ կայացել էր Իջևանում: Այդ խաղում 22-րդ րոպեին հաշիվը բացեց  շիրակցի Գևորգ Հովհաննիսյանը: Առաջին խաղակեսի ավարտին Գագա Թբիլաշվիլին վերականգնեց հավասարակշռությունը: "Շիրակին” հաղթանակ պարգևեց խաղավարտից 5 րոպե առաջ 11մ հարվածով Անդրանիկ Բարիկյանի խփած գոլը: Իսկ առաջնության հաջորդ 3 խաղերում էլ հաջողության հասան "Իմպուլսի” ֆուտբոլիստները:

Առաջնության 2-րդ շրջանի հանդիպումը կայացավ մրցակիցների համար չեզոք դաշտում` Աբովյանի "Քաղաքային” մարզադաշտում, որտեղ դաշտի տիրոջ կարգավիճակում "Իմպուլսն” էր: Այդ խաղում հաջողությունն ուղեկցեց դիլիջանցիներին, որոնց կազմում 2 անգամ աչքի ընկավ Հովհաննես Գոհարյանը` Իգոր Լոգվինովի պաշտպանած դարպասը մեկական գնդակ խփելով յուրաքանչյուր խաղակեսին: Շիրակցիներին հաջողվեց միայն կրճատել հաշիվը: 64-րդ րոպեին գոլի հեղինակ դարձավ Մկրտիչ Նալբանդյանը:

3-րդ շրջանի հանդիպումը գոլառատ ստացվեց: "Իմպուլսը” 3:2 հաշվով ռևանշի հասավ` տոնելով կամային հաղթանակ: Առաջինը հաջողության հասան շիրակցիները, որոնք 36-րդ րոպեին Անդրանիկ Բարիկյանի խփած գոլի շնորհիվ բացեցին հաշիվը: Սակայն ընդմիջման գնալիս հաշիվն արդեն 2:1 էր` հօգուտ "Իմպուլսի”: Աչքի էին ընկել Արթուր Բարսեղյանն ու Նորայր Գյոզալյանը` բացելով գոլերի հաշիվն "Իմպուլսում”: Ընդ որում Գյոզալյանն այդ խաղում նորամուտն էր նշում "Իմպուլսում”: Խաղավարտից 8 րոպե առաջ Սամվել Հակոբյանը 3-րդ անգամ գրավեց Իգոր Լոգվինովի պաշտպանած դարպասը, որին խաղավերջում "Շիրակը” պատասխանեց Կարեն Ալեքսանյանի խփած գոլով:

4-րդ շրջանում կրկին հաջողությունն ուղեկցեց դիլիջանցիներին, որոնք կամային հաղթանակ տարան 2:1 հաշվով: Շիրակցիները Դավիթ Հակոբյանի խփած գոլի շնորհիվ բացեցին հաշիվը, սակայն 3 րոպե անց Ալհասան Իլիասուն վերականգնեց հավասարակշռությունը: "Իմպուլսը” հաղթանակը կորզեց խաղավարտից 2 րոպե առաջ Զավեն Բադոյանի խփած գոլի շնորհիվ:

2010թ. էլ, երբ "Իմպուլսը” նորամուտը նշեց բարձրագույն խմբում, դիլիջանցիները բավական հաջող խաղացին շիրակցիների հետ` տոնելով 3 հաղթանակ, մեկ խաղ ավարտելով ոչ-ոքի:

Մրցակիցների առաջին ծանոթությունը տեղի է ունեցել 2010թ. ապրիլի 25-ին, Դիլիջանի քաղաքային մարզադաշտում: "Շիրակն” անհաջող էր մեկնարկել` առաջին 4 հանդիպումներում զիջելով մրցակիցներին: Իսկ ահա բարձրագույն խմբի նորեկ "Իմպուլսը” մեկնարկային 4 հանդիպումներում նույնքան միավոր էր վաստակել: Խաղն ավարտվեց դիլիջանցիների հաղթանակով` 2:1: Խաղասկիզբը շատ անհաջող դասավորվեց շիրակցիների համար: Դաշտի տերերն ընդամենը 2 րոպեում երկու անգամ գրավեցին շիրակցիների դարպասը: Աչքի ընկան Արման Մինասյանն ու Տիգրան Ոսկանյանը: Գյումրեցիներից միակ պատասխան գնդակը խփեց Գևորգ Հովհաննիսյանը:

Մրցակիցների մրցավեճում առավել արդյունավետ են գործել  շիրակցիներ Անդրանիկ Բարիկյանն ու Մկրտիչ Նալբանդյանը` խփելով 3-ական գնդակ: "Իմպուլսից” 2-ական գոլի հեղինակ են դարձել Զավեն Բադոյանը, Տիգրան Ոսկանյանը և Հովհաննես Գոհարյանը:

"Շիրակի” կազմում հանդիպմանը չեն մասնակցի գավաթի եզրափակիչում դաշտից հեռացված Կարեն Ալեքսանյանն ու 4-րդ զգուշացումը ստացած Անդրանիկ Բարիկյանը: