Վերջին հանդիպումներում Գյումրու «Շիրակի» սենեգալցի լեգիոներ Լի Լամին Յորոն դառնում է հաղթական գոլերի հեղինակ: Նա Հայաստանի գավաթի եզրափակիչում դարձավ միակ եւ ոսկե գոլի հեղինակ՝ պարգեւելով իր թիմին այդքան բաղձալի հաղթանակը: Ակումբի պաշտոնական կայքի հետ զրույցում Յորոն խոսեց վերջին շրջանում «Շիրակի» հաջողությունների մասին:

-  Դու գավաթի եզրափակիչում դարձար այդքան կարեւոր գոլի հեղինակ: Ի՞նչ զգացմունքներ ունեցար այդ պահին:

-  Անփոխանցելի զգացմունքներ ապրեցի այդ պահին: Ես շատ երջանիկ եմ, որ կարողացա օգնել իմ թիմին նվաճել այդ տիտղոսը, քանի որ մեր առջեւ դրված էր այդպիսի խնդիր՝ նվաճել գավաթը: Սա շատ մեծ վստահություն տվեց մեզ, այժմ մենք հնարավորություն ունենք խաղալու Եվրոպա Լիգայում, որը շատ կարեւոր է բոլորիս համար: Եվ հիմա արդեն պետք է մտածենք այն մասին, որ  առաջնությունում   զբաղեցնենք մրցանակային տեղեր եւ, ինչու ոչ, նաեւ ձգտենք չեմպիոնության:

-  Այդ հանդիպմանը «Շիրակը» ցուցադրեց թիմային խաղ…

-  Այո, «Շիրակն» օրեցօր սկսում է լավ խաղալ եւ դա, իհարկե, թիմային խաղի շնորհիվ: Տղաները մեծ ծավալի աշխատանք կատարեցին այդ օրը, իսկ Բարիկյանի անցումը եւ փոխանցումը ուղղակի հիանալի էին: Կարծում եմ, որ բոլորն էլ համոզվեցին, որ շատ կարեւոր է թիմային ոգին եւ թիմում տիրող մթնոլորտը:

-  Սա քո առաջի՞ն տիտղոսն է:

-  Ես առաջին անգամ եմ դառնում գավաթակիր եւ շատ ուրախ եմ, որ դա ինձ հաջողվեց անել հենց «Շիրակի» նման թիմի հետ: Եվ առաջին անգամ է, որ ես պետք է հանդես գամ նման կարգի մրցաշարում, ինչպիսին Եվրոպա Լիգան է:

-  Վերջին հանդիպումներում, սկսած գավաթի եզրափակիչից, դու քո բոլոր գոլերը նվիրում ես Դիոպ Դամեին: Դու խոստացե՞լ ես նրան դա:

-  Խոստացել եմ, քանի որ նա «Միկայի» հետ կիսաեզրափակիչ երկրորդ հանդիպմանը իր հիանալի խաղով մեզ դուրս բերեց եզրափակիչ: Հետո նա ստացավ ծանր վնասվածք, եվ մինչ այժմ չի վերականգնվել: Այդ հանդիպումից ի վեր, ես իմ  խփած բոլոր գոլերը նվիրում եմ ընկերոջս: