Կիրակի օրը կայացած «Ուլիս» – «Շիրակ» (1:1) հանդիպումից հետո հետխաղյա մամուլի ասուլիսի ժամանակ, , «Շիրակի» մարզիչ Ֆելիքս Խոջոյանը մեկ անգամ ևս հաստատեց տեղեկությունն այն մասին, որ իրոք բանակցություններ են ընթանում Հայաստանի հավաքականի 25-ամյա պաշտպան Հրայր Մկոյանին «Շիրակ» հրավիրելու շուրջ ու մոտակա օրերին այս հարցում պարզություն կլինի:

Նկատենք, որ Մկոյանը իր կարիերան 2005թ.-ին սկսել է հենց «Շիրակում», որի կազմում մասնակցել է 38 հանդիպման ու դարձել 2 գոլի հեղինակ: Ապա 2007-2009թթ. վարձավճարով հանդես է եկել «Արարատում» և «Ուլիսում», իսկ 2010թ.-ից էլ արդեն ազատ խաղացողի կարգավիճակով ելույթները շարունակել է «Միկայում»:

Այս տարվա սկզբին Հրայրը տեղափոխվել էր Նալչիկի «Սպարտակ», որը հետագայում դուրս մնաց Ռուսաստանի պրեմիեր լիգայից: Այժմ Մկոյանը կրկին ազատ խաղացողի կարգավիճակ ունի, ու իր համար նոր թիմ է փնտրում:

Խոջոյանը նշեց,որ եթե Մկոյանը տա իր համաձայնությունը,ապա նրան կրկին սիրով կընդունեն «Շիրակում»:

Ավելացնենք, որ մինչ Հայաստանի ազգային հավաքականի մայիսի 26-ին սկսած ուսումնամարզական հավաքը, Հրայրը մարզավիճակը պահպանելու նպատակով մարզվում էր հենց «Շիրակի» հետ: