Շիրակն» այսօր առաջին մարզումն է անցկացնելու Գյումրիի քաղաքային մարզադաշտում, որը 1.5 տարվա վերանորոգումից հետո 2 օր անց կընդունի Հայաստանի գավաթի եզրափակիչ հանդիպումը:

Մարզումից առաջ armsport.am-ը զրուցեց «Շիրակի» առաջատար խաղացողներից մեկի` Անդրանիկ Բարիկյանի հետ:

- Անդրանիկ, ընթացիկ մրցաշրջանում արդեն հասցրել ես մի քանի դեղիններ ստանալ ու մեկ անգամ էլ հեռացվել խաղադաշտից: Փաստորեն ավանդույթները շարունակվում են…

- (Ծիծաղում է): Էմոցիաների արդյունք են եղել այդ քարտերը, բայց ես աշխատում եմ այդ ուղղությամբ ու այնպես պետք է անեմ, որ հետագա խաղերում նման բան չկրկնվի:

- Վաղուց Գյումրում հանդես չեք եկել: 2010թ. աշնանը, երբ սկսվեցին վերանորոգման աշխատանքները, մտքովդ անցե՞լ էր որ վերանորոգումից հետո մարզադաշտում առաջին խաղը «Շիրակը» գավաթի եզրափակիչ հանդիպումն է անցկացնելու:

- Իրոք, այն ժամանակ դժվար էր նման բան պատկերացնել: Արդեն 1.5 տարի է հանդես չենք եկել սեփական հարկի տակ ու մեծ անհամբերությամբ ենք սպասում առաջիկա խաղին: Գյումրիում հանդես գալը մեզ ավելի է ուժեղացնում:

- Մարզադաշտի վերջնական տեսքից ի՞նչ տպավորություն ստացար:

- Շատ լավ տեսք է ստացել մարզադաշտը, իսկ խոտածածկի որակն էլ միայն հիացմունք է առաջացնում: Մնում է հաղթենք…

- «Շիրակը» 2-րդ տարին անընդմեջ դուրս է եկել եզրափակիչ: Նախորդ տարի թիմը Երևանում պարտվեց «Միկային»: Ի՞նչ զուգահեռներ կարող ես անցկացնել նախորդ տարվա ու այս մրցաշրջանի «Շիրակի» միջև:

- Չէի ասի, թե նախորդ տարվա եզրափակիչում հանդես եկած «Շիրակը» թույլ էր: Պարզապես մեր խաղն այդ օրը չստացվեց: Դա նաև լավ դաս էր մեզ համար, որ հաջող հանդես գանք այս տարվա եզրափակիչում: Անպայման պետք է հաղթենք այս տարի:

- Նկատելի է, որ Գյումրիում մեծ անհամբերությամբ են սպասում եզրափակչին: Հնարավո՞ր է, որ լեփ-լեցուն տրիբունաները ավելորդ լարվածություն ստեղծեն «Շիրակի» մոտ:

- Չեմ կարծում, թեև Գյումրիում խաղի նկատմամբ հետաքրքրությունը մեծ է ու մարդիկ անհամբեր սպասում են խաղին: Մարզադաշտում ասեղ գցելու տեղ չի լինի ու դա բնական է, քանի որ այս քաղաքը ֆուտբոլի հանդեպ մեծ սեր ունի: Երկրպագուների աջակցությունը պետք է օգնի մեզ, որ վերջապես նվաճենք գավաթը:

- «Շիրակի» մրցակցի` «Իմպուլսի» մասնակցությամբ որևէ հանդիպում այս տարի դիտե՞լ ես:

- Այո, դիտել եմ «Իմպուլս»-«Ուլիս» գավաթային հանդիպումը: Բավական լավ թիմ է «Իմպուլսը», որն առաջնության վերջին խաղերում միայն հաղթանակներ է տոնել ու 2-րդ տեղում է ընթանում: Արդյունքներն արդեն շատ բան են ասում: Մրցակցին թերագնահատելու մասին խոսք անգամ չի կարող լինել: