«Շիրակի» ու Հայաստանի երիտասարդական հավաքականի նախկին գլխավոր մարզիչ Անդրանիկ Ադամյանը ներկայումս Գյումրին ներկայացնող ակումբի սպորտային տնօրենն է: 1990-ականների «Շիրակի» ու ներկայիս թիմի ընկերական խաղում Ադամյանն էր ղեկավարում վետերանների գործողությունները, իսկ խաղից հետո պատասխանեց armsport.am-ի հարցերին:

- Պարոն Ադամյան, երկու օր առաջ գավաթի եզրափակիչը կայացավ Գյումրիում ու «Շիրակը» հաղթանակ տոնեց: Խաղից առաջ Դուք նպատակահարմար չգտաք հարցազրույց տալ՝ հաշվի առնելով հանդիպման նկատմամբ առկա լարվածությունը: Այժմ եզրափակիչը պատմության գիրկն է անցել եւ կարող ենք լսել Ձեր կարծիքը` հանդիպման վերաբերյալ:

- Շնորհավորում եմ «Շիրակին» ու Գյումրիի ներկայացուցիչներին, թիմի բոլոր երկրպագուներին: Մենք ամեն ինչ նվաճել էինք Հայաստանում՝ բացառությամբ գավաթի: 5-րդ անգամից հաջողվեց հաղթել եզրափակիչում: Բոլորից շատ ուրախ եմ ես: Իմ մարզիչ եղած ժամանակ չստացվեց, սակայն իմ սաներին, ի վերջո, հաջողվեց դառնալ գավաթակիր: Սա վերածնված «Շիրակի» առաջին լուրջ ձեռբերումն է: Համոզված եմ՝ այն դեռ շատ ծիլեր կտա ու ամբողջությամբ կկարողանանք վերականգնել ավանդույթները: Ուրախությունս բավական մեծ է ու համոզված եմ, որ հաջողությունները շարունակական բնույթ են կրելու:

- Եզրափակչի նկատմամբ առկա հսկայական հետաքրքրությունից «Շիրակի» ներկայացուցիչների մոտ մտավախություն էր առաջացել, որ ֆուտբոլիստները կարող են «վառվել»…

-Այո, նման մտավախություն ունեինք: 2 տարվա ընդմիջումից հետո գավաթի եզրափակիչը ու մարզադաշտի վերաբացումը համընկան, ինչն էլ ավելի մեծացրեց խաղի արժեքն ու հետաքրքրությունը քաղաքում: Թիմի ներկայացուցիչները ու առաջին հերթին մարզիչները կարողացան թիմին ճիշտ տրամադրել խաղին: Ճիշտ է` սկզբում կար լարվածություն, բայց լավ խաղ ստացվեց: Բոլորս էլ տեսանք, որ գոլային պահերով «Շիրակն» առավելություն ուներ ու խաղը կարող էր ավելի գոլառատ ստացվել: Ամեն դեպքում, փառք ու պատիվ թիմի ներկայացուցիչներին, որ կարողացան հավասարակշռված եզրափակիչ խաղալ:

- Ֆուտբոլային եւս մեկ տոնի Գյումրին ականատես եղավ այսօր: Ասպարեզ դուրս եկան թիմի վետերանները ու ներկայիս խաղացողները: Ի՞նչ տպավորություններ մնացին այս խաղից:

- Փորձն ու երիտասարդությունն այսօր ձուլվեցին խաղադաշտում ու դա գեղեցիկ էր նայվում: Ստացվեց լավ շոու, ինչն ակնկալվում է նման խաղերում: Ֆուտբոլի պրոպագանդման համար նման խաղերը շատ կարեւոր են: Կային բացակա խաղացողներ: Մասնավորապես Հարություն Վարդանյանը չկարողացավ ժամանել: Շնորհակալություն կազմակերպիչներին, շնորհակալություն խաղին ժամանած խաղացողներին:

- Այսօրվա մրցավեճում շուրջ 2000 ֆուտբոլասերներ տեսանք մարզադաշտում, թեեւ հանդիպումն ընկերական բնույթ էր կրում: Կարելի՞ է ենթադրել, որ առաջիկայում «Շիրակի» մասնակցությամբ առաջնության խաղերին տրիբունաները լեփ-լեցուն կլինեն:

- Միանշանակ՝ այո: Մեր քաղաքը կարոտ է լավ ֆուտբոլին: Վերակառուցված մարզադաշտում վերածնված «Շիրակն» իր խաղով ամեն ինչ կանի, որ ֆուտբոլը կարոտած երկրպագուները կրկին այցելեն մարզադաշտ, ոգեւորեն թիմին ու ոգեւորած հեռանան մարզադաշտից: