Գյումրիի «Շիրակը» նախապատրաստվում է ապրիլի 29-ին կայանալիք Հայաստանի գավաթի եզրափակչին, որն առաջին անգամ կայանալու է Գյումրում: «Շիրակի» մրցակիցն է լինելու մարզային մեկ այլ ակումբ` Դիլիջանի «Իմպուլսը», որն առաջին անգամ է դուրս եկել եզրափակիչ:

կարճ զրույց Վարդան Բիչախչյանի հետ:

- Պարոն Բիչախչյան, ընդամենը 3 օր է մնացել գավաթի եզրափակչին: Ինչպե՞ս է անցնում նապատրաստական փուլը:

- Պատրաստվում ենք սովորական կերպով: Պետք է խուսափենք ավելորդ լարվածությունից: Սա հերթական պաշտոնական հանդիպումն է:

- Առաջնության մեկնարկային խաղերում «Շիրակի» մի շարք խաղացողներ վնասվածքներ ունեին ու ոչ միշտ էին դուրս գալիս ասպարեզ: Այս պահին կադրային կորուստներ կա՞ն:

- Կբացակայի միայն Դամե Դիոպը, ով «Բանանցի» հետ առաջնության խաղի ժամանակ ոտքի կոտրվածք էր ստացել: Բարեբախտաբար մյուսներն արդեն ապաքինվել են ու պատրաստվում են հանդիպմանը:

- Եզրափակիչն առաջին անգամ Գյումրիում է անցկացվելու: Քաղաքում զգացվո՞ւմ է ֆուտբոլային շունչը:

- Այո, աժիոտաժը բավական մեծ է: Բոլորը միայն ֆուտբոլից են խոսում: Ֆուտբոլային տոնն ապահովված կլինի ապրիլի 29-ին:

- «Շիրակը» 5-րդ անգամ է դուրս գալիս եզրափակիչ, բայց դեռ ոչ մի անգամ չի դարձել գավաթակիր:

- 5-րդ անգամ ու 2-րդ տարին անընդմեջ: Պետք է ամեն ինչ անենք, որ այս անգամ վերջապես տիրենք գավաթին: Այս անգամ ընձեռնվել է բացառիկ հնարավորություն: