"ՇԻՐԱԿ”-"ՓՅՈՒՆԻԿ”        53 խաղ, +14=7-32, 58:100
21 ապրիլի, ժ.16:00, Իջևան, "Արնար” մարզադաշտ

Վաղը մեկնարկում է Հայաստանի առաջնության 5-րդ տուրը:        

Ընթացիկ առաջնության մեկնարկը մրցակիցների համար տարբեր կերպ դասավորվեց: "Շիրակը” մեկնարկեց 2 անընդմեջ հաղթանակներով, այնուհետև հաջողությամբ լուծեց գավաթի եզրափակիչ մտնելու խնդիրը` ուղեգիր նվաճելով գործող գավաթակիր "Միկայի” հետ չափազանց համառ մրցապայքարում: Այնուհետև "Շիրակն” իր երկրպագուներին տհաճ անակնկալ մատուցեց` 0:3 հաշվով զիջելով "Բանանցին”, որը մինչ այդ հաղթանակ չէր տարել:

Իր երկրպագուներին ավելի մեծ տհաճություն է պատճառել "Փյունիկը” թիմի պատմության մեջ աննախադեպ անհաջող մեկնարկով: Փյունիկցիները դեռևս չեն ճաշակել հաղթանակի քաղցրությունն ու ընդամենը 1 միավոր են վաստակել: Անշուշտ, այս խաղում Սուրեն Չախալյանի սաները կփորձեն շտկել իրավիճակը: Սակայն շիրակցիներն էլ, որոնց համար "Փյունիկի” հետ մրցավեճը վերջինն է գավաթի վճռորոշ մրցախաղից առաջ, ամեն ինչ անելու են հաջող ելույթ ունենալու ու բարձր տրամադրությամբ եզրափակիչ հանդիպմանը ներկայանալու համար:

Հայաստանի առաջնությունների ամենատիտղոսակիր թիմերի հերթական հանդիպումը 54-րդն է: Առաջինը կայացել է ՀՀ անդրանիկ առաջնությունում: Նախնական փուլում "Շիրակն” ու "Փյունիկը”, որն այն ժամանակ հանդես էր գալիս ՀՄԸՄ անվանումով, ընդգրկված էին տարբեր ենթախմբերում: Ուստի նրանք հանդիպեցին միայն եզրափակիչ փուլում: 1992թ. սեպտեմբերի 17-ին Երևանում կայացած խաղում ՀՄԸՄ-ն հաղթեց 3:1 հաշվով: Անդրանիկ գոլի հեղինակն Արսեն Ավետիսյանն էր, որն արդեն 5-րդ րոպեին գրավեց Ռայմոնդ Զադուրյանի պաշտպանած դարպասը: Գյումրեցիներից միակ գոլի հեղինակն Աբրահամ Խաշմանյանն էր: Երևանյան թիմի հաղթանակն ապահովեցին Պողոս Գալստյանի խփած 2 գոլերը: Խաղի մասնակիցների թվում էին "Փյունիկի” ներկայիս ավագ Սարգիս Հովսեփյանը, թիմի գլխավոր մարզիչ Սուրեն Չախալյանը, մարզիչներ Արթուր Ավագյանն ու Վարազդատ Ավետիսյանը և ակումբի տեխնիկական տնօրեն Վարդան Մինասյանը: Հոկտեմբերի 17-ին Գյումրիում կայացած խաղում շիրակցիները մրցակցի նկատմամբ համոզիչ ռևանշի հասան` հաղթելով խոշոր` 4:1 հաշվով:

ՀՀ առաջին չեմպիոնների դիմակայությունը կարելի է բաժանել 2 մասի: Անցյալ դարի 90-ականներին մրցակիցների միջև կայացած մրցախաղերում առավելությունը շիրակցիների կողմն է եղել: Նրանք տոնել են 8 հաղթանակ, փյունիկցիները հաղթող են դուրս եկել 5 խաղում: Ընդ որում 1993թ. "Շիրակը” հաղթել է 6:1 հաշվով: Դա ՀՀ առաջնություններում փյունիկցիների կրած ամենախոշոր հաշվով պարտություններից մեկն է: Ի դեպ, 1998թ. նույնպիսի հաշվով "Շիրակը” հաղթել է 2 անգամ, մեկ անգամ էլ 5 անպատասխան գնդակ է խփել փյունիկցիների դարպասը:

Իսկ ահա 2001թ.-ից, երբ "Փյունիկը” երկամյա ընդմիջումից հետո վերակազմավորվեց ու կրկին մասնակցեց առաջնությանը, չեմպիոնի առավելությունը շիրակցիների նկատմամբ զգալի է` 27 հաղթանակ, 5 ոչ-ոքի, 6 պարտություն: 2003-2004, 2006, 2010 թթ. կայացած բոլոր 16 հանդիպումներում էլ հաղթել է "Փյունիկը”: Ընդ որում 2010թ. բոլոր 4 խաղերում էլ ”Շիրակը” չեմպիոնին զիջել է խոշոր հաշիվներով` ընդհանուր առմամբ բաց թողնելով 16 գոլ, խփելով ընդամենը մեկ գնդակ: Այդ խաղերում փյունիկցի Գևորգ Ղազարյանը 2 հեթ տրիկի հեղինակ է դարձել: Անցած մրցաշրջանում 2 անգամ հաջողության է հասել "Փյունիկը”, մեկ անգամ հաղթել է "Շիրակը”: Իսկ ահա Հայաստանի գավաթի խաղարկությունում "Շիրակը” քառորդ եզրափակիչում պայքարից դուրս թողեց փյունիկցիներին: Իջևանում կայացած գավաթի առաջին խաղում  շիրակցիներն Անդրանիկ Բարիկյանի խփած գոլի շնորհիվ հաղթում էին "Փյունիկին”, սակայն խաղավարտից 3 րոպե առաջ իր թիմին պարտությունից փրկեց Սարգիս Հովսեփյանը: Իսկ Երևանում Տիագո Լոպեսի խփած միակ գոլի շնորհիվ "Շիրակը” կիսաեզրափակիչի ուղեգիր նվաճեց:

Մրցակիցների մրցավեճում բոլորից արդյունավետ է գործել Գևորգ Ղազարյանը, որի օգտին 11 գոլ է գրանցված: 2-րդ արդյունքն ունի Էդգար Մանուչարյանը, որը թեև քիչ հանդիպումների է մասնակցել, սակայն 10 անգամ գրավել է շիրակցիների դարպասը: "Փյունիկին” առավել մեծ տհաճություն է պատճառել "Շիրակի” բոլոր տարիների լավագույն ռմբարկու Արթուր Պետրոսյանը, որը խփել է 8 գնդակ: Շիրակցիների ներկայիս ֆուտբոլիստներից լավագույն արդյունքը ցույց է տվել Արարատ Հարությունյանը` խփելով 5 գոլ: