"ՇԻՐԱԿ”-"ՄԻԿԱ”   42 խաղ, +7=13-22, 27:69
16 մայիսի, ժ.17:00, Գյումրի, Քաղաքային մարզադաշտ

Նախորդ խաղում "Միկան” սեփական հարկի տակ 2:1 հաշվով հաղթելով "Շիրակին” ոչ միայն ռևանշի հասավ գյումրեցիներից գավաթի խաղարկությունում կրած պարտության դիմաց, այլև էլ ավելի ամրապնդեց առաջատարի դիրքը: Ընթացիկ առաջնությունում "Միկայի” երիտասարդ ֆուտբոլիստներն աչքի են ընկնում գրագետ գործողություններով և ագրեսիվ խաղով, ուստի օրինաչափ է թիմի առաջատարի դիրքը:

Գրեթե 2 տարվա ընդմիջումից հետո "Միկան” կրկին "Շիրակին” հյուրընկալվելու է Գյումրիում: Վերջին անգամ "Միկան” Գյումրիի քաղաքային մարզադաշտում հանդես է եկել 2010թ. օգոստոսի 21-ին: Հանդիպման ելքը վճռել է "Միկայի” լեգեոնական Էդնեյի 11մ հարվածով խփած միակ գոլը: Դա Գյումրիում միկացիների տոնած 7-րդ հաղթանակն էր: Ընդ որում 2008-2010թթ. Գյումրիում անցկացրած առաջնության վերջին 5 հանդիպումներում էլ հաջողությունն ուղեկցել է "Միկայի” ֆուտբոլիստներին, որոնք ընդհանուր առմամբ այդ խաղերում 8 գոլ են խփել, սեփական դարպասը պահել են անառիկ: Հատկապես գոլառատ է եղել 2009թ. մայիսի 23-ին Գյումրիում կայացած հանդիպումը, որում "Միկան” հաղթել է 4:0 հաշվով:

Հետաքրքիր է, որ միայն 2004թ. է միկացիներին հաջողվել առաջին հաղթանակը տոնել Գյումրիում: Հանդիպման ելքը վճռել է Դավիթ Գրիգորյանի խփած միակ գոլը: Իսկ մինչ այդ Գյումրիում կայացած 6 հանդիպումներից 3-ում հաջողության էին հասել շիրակցիները, 3-ում գրանցվել էր ոչ-ոքի: Վերջին հաղթանակը Գյումրիում "Շիրակը” տոնել է 2007թ. հունիսի 14-ին Ժորա Բարսեղյանի գլխավորությամբ: Շիրակցիներին հաղթանակ է պարգևել Տիգրան Հովհաննիսյանի խփած միակ գոլը:

Հերթական հանդիպումը մրցակիցների 20-րդ մրցավեճն է Գյումրիում: Շիրակցիներն ընդամենը 4 հաղթանակ են տոնել, 8 խաղ ավարտվել է ոչ-ոքի (6-ը` գոլազուրկ), 7-ում հաջողությունն ուղեկցել է "Միկային”: Գյումրեցիները խփել են 11 գնդակ, "Միկան” մրցակցի դարպասը գրավել է 15 անգամ: Գյումրիում շիրակցիներից առավել արդյունավետ է գործել Տիգրան Դավթյանը` խփելով 3 գնդակ: Հետաքրքիր է, որ 2005թ. էլ հանդես գալով "Միկայում”, Դավթյանը Գյումրիում մեկ անգամ գրավել է իր նախկին թիմակիցների դարպասը: "Միկայի” ֆուտբոլիստներից Գյումրիում 2-ական գոլի հեղինակ են դարձել Արամ Ոսկանյանն ու Բոտի Դեմելը, ընդ որում վերջինս 2009թ. դարձել է դուբլի հեղինակ:

Անցած մրցաշրջանում "Շիրակը” "Միկային” 2 անգամ հյուրընկալեց Իջևանում: "Արնար” մարզադաշտն ավելի հաջողակ էր "Շիրակի” համար, որն առաջին խաղում հաղթեց 1:0 հաշվով, իսկ 2-րդ հանդիպումն ավարտվեց ոչ-ոքի` 1:1:

"Միկայի” կազմում բոլոր հանդիպումներում առավել արդյունավետ է գործել Արտյոմ Ադամյանը` խփելով 7 գնդակ: Շիրակցիներից բոլորից շատ` 4 գնդակ է խփել Տիգրան Դավթյանը:

Շիրակցիներից հանդիպմանը չի մասնակցի 4-րդ զգուշացումը ստացած Բորիս Կադիո Դիդյեն: Վնասվածքներ ունեն Տիգրան Դավթյանն ու Դամե Դիոպը: