Այս թիմերը ընթացիկ մրցաշրջանում միմյանց հանդիպում են արդեն 6-րդ անգամ, թեեւ սա ՀՀ առաջնության 5-րդ շրջանի վերջին հանդիպումն է: Դրանցից 3-ում հաղթել են գյումրեցիները՝ ՀՀ առաջնության 1-ին եւ 2-րդ շրջաններում համապատասխանաբար 3:1 եւ 2:0 հաշիվներով, իսկ ՀՀ գավաթի 21-րդ խաղարկության եզրափակչում՝ 1:0 հաշվով: Գյումրիում ընթացած 3-րդ շրջանի խաղում արձանագրվել է ոչ-ոքի՝ 1:1 արդյունքը, իսկ 4-րդ շրջանում հաջողությունն արդեն ուղեկցել է «Իմպուլսին», որն Արարատի «Այգ» մարզաբազայի խաղադաշտում 3:1 հաշվով կարողացել է պարտության մատնել միանձնյա առաջատարին: Այս խաղում դուբլի հեղինակ է դարձել առաջնության լավագույն ռմբարկու Նորայր Գյոզալյանը, իսկ ահա «Շիրակի» հարձակման գծի առաջատար Անդրանիկ Բարիկյանն, ու «Իմպուլսի» կիսապաշտպան Ռումյան Հովսեփյանը աչքի են ընկել 1-ական անգամ: Նկատենք, որ նախորդ 2 մրցաշրջաններում այս թիմերի միջեւ անցկացված հանդիպումներում «Իմպուլսը» բացահայտ առավելություն ուներ՝ 6 անգամ հաղթել էր հակառակորդին, 1-ում՝ պարտվել, եւ մեկ խաղում էլ ոչ-ոքի էր գրանցվել: «Շիրակը» նոր տարում անցկացրած առաջնության 2 խաղերում թեեւ միայն 1 միավոր է վաստակել, ու դեռ մրցակիցների դարպասը չի գրավել, սակայն վաստակած 70 միավորով շարունակում է միանձնյա գլխավորել մրցաշարային աղյուսակը: Իսկ, ահա «Իմպուլսը» 33-րդ տուրում Կապանում 1:2 հաշվով «Գանձասարին» զիջելուց հետո, հաջորդ տուրում սեփական հարկի տակ 2:0 հաշվով հաղթեց ՀՀ չեմպիոն «Ուլիսին», եւ իր ակտիվում գրանցած 51 միավորով ընթանում է 5-րդ տեղում, ու 3-4-րդ տեղերը բաժանող «Փյունիկից» ու «Գանձասարից» միայն 1 միավորով է ետ մնում: «Շիրակը» խաղին ներակյանում է առանց կորուստների, իսկ

«Իմպուլսի» կազմում կբացակայի միայն վնասվածքից ապաքինվող Նարեկ Դավթյանը: