"ՇԻՐԱԿ”-"ԱՐԱՐԱՏ”          53 խաղ, +15=19-19, 60:68
20 մայիսի, ժ.18:00, Գյումրի, Քաղաքային մարզադաշտ

Ոսկեհատում կայացած մրցակիցների առաջին շրջանի խաղում "Շիրակը” կամային հաղթանակ տոնեց: Արա Հակոբյանի խփած գոլին շիրակցիները պատասխանեցին Գևորգ Հովհաննիսյանի և Իսմայել Ֆոֆանա Բեկոյի դիպուկ հարվածներով:

Գրեթե 3 տարվա ընդմիջումից հետո "Արարատը” կրկին Գյումրիում մրցելու է "Շիրակի” հետ: Մրցակիցների վերջին հանդիպումը Գյումրիի քաղաքային մարզադաշտում կայացել է 2009թ. հուլիսի 25-ին ու ավարտվել է մարտական ոչ-ոքի` 2:2:

Գյումրիում մրցակիցների դիմակայությունը կարելի է բաժանել 2 մասի: Սկզբնական շրջանում մինչև 1998թ. ներառյալ արարատցիներին ոչ մի կերպ չէր հաջողվում Գյումրիում հաղթել: Այդ ընթացքում Գյումրիում մրցակիցների միջև կայացած 8 հանդիպումներից 4-ում հաղթել էին շիրակցիները, 4 խաղում էլ գրանցվել էր ոչ-ոքի միևնույն 1:1 հաշվով: Ի դեպ, Գյումրիում ընդհանուր առմամբ գրանցված 11 ոչ-ոքիներից  8-ում արձանագրվել է 1:1 հաշիվը:

Միայն 1999թ. արարատցիներին վերջապես հաջողվեց անդրանիկ հաղթանակը (2:1) տոնել Գյումրիում: Ապրիլի 7-ին կայացած այդ խաղում "Արարատին” հաղթանակ պարգևեցին Խոսե Բիլիբիոյի և Արթուր Մինասյանի խփած գոլերը: Դրանից հետո մինչև 2004թ. ներառյալ Գյումրիում կայացած 7 հանդիպումներից 6-ում գրանցվեց ոչ-ոքի (4 անգամ` 1:1) և միայն մեկ խաղում (2002թ.) հաջողությունն ուղեկցեց շիրակցիներին շնորհիվ Արարատ Հարությունյանի խփած միակ գոլի:

Հարկ է նշել, որ 2002-2008թթ. ուժերի հարաբերությունը կտրուկ փոխվեց: Այդ ժամանակահատվածում "Արարատը” շիրակցիների ամենաանհարմար մրցակիցն էր: 2002թ. առաջնության 2-րդ շրջանից  մինչև 2008թ. ներառյալ անցկացված 17 հանդիպումներից 12-ում հաղթել էին արարատցիները, 5-ում գրանցվել էր ոչ-ոքի: Ընդ որում 2006թ. 3-րդ շրջանից սկսած արարատցիները շիրակցիներին հաղթել էին բոլոր 10 անընդմեջ հանդիպումներում: Հետաքրքիր է, որ 2007թ. գյումրեցիներին չէր հաջողվել գրավել "Արարատի” դարպասը` սեփականը բաց թողնելով 8 գնդակ: Գյումրիում անցկացված հանդիպումներում էլ արարատցիների առավելությունը զգալի էր: Նրանք 9 հանդիպումներից 5-ում հաղթել էին, 4 խաղում արձանագրվել էր ոչ-ոքի:

Միայն 2009թ. շիրակցիները վերջապես ընդհատեցին անհաջողությունների շարքն ու "Արարատի” հետ անցկացրած 4 հանդիպումներից 3-ում հաղթեցին, մեկն ավարտեցին ոչ-ոքի: Այդ մրցաշրջանում արարատցիների հետ հանդիպումներում արդյունավետ խաղով հատկապես աչքի ընկավ Անդրանիկ Բարիկյանը` խփելով 5 գնդակ: Ընդ որում մայիսի 17-ին Աբովյանում կայացած խաղում նա հեթ տրիկի հեղինակ էր դարձել` գոլերից մեկը խփելով 11մ հարվածով:

Անցած մրցաշրջանի ավարտական խաղում էլ, "Հրազդան” մարզադաշտում Անդրանիկ Բարիկյանն իր օգտին հեթ տրիկ գրանցեց` գոլերից մեկը կրկին խփելով 11մ հարվածով: Այդ խաղում "Շիրակը” հաղթեց 3:1 հաշվով:

Անցած տարի "Շիրակն” "Արարատին” 2 անգամ հյուրընկալեց Իջևանում: Առաջին խաղում գրանցվեց ոչ-ոքի` 1:1, 2-րդում "Շիրակը” հաղթեց 1:0 հաշվով:

Ընդհանուր առմամբ Գյումրիում երկու թիմերի միջև  կայացած առաջնության 24 հանդիպումներից 7-ում հաղթել են շիրակցիները, 6-ում հաջողությունն ուղեկցել է արարատցիներին, 11 անգամ էլ գրանցվել է ոչ-ոքի: Գյումրիում շիրակցիներից բոլորից արդյունավետ է գործել Կոլյա Եփրանոսյանը` 5 անգամ գրավելով "Արարատի” դարպասը: 4 գնդակ է խփել Արթուր Պետրոսյանը: Արարատցիներից 4-ական անգամ աչքի են ընկել Նշան Էրզրումյանն ու Մարկոսը: Ընդ որում Էրզրումյանը 2006թ. Գյումրիում հեթ տրիկի հեղինակ է դարձել, իսկ 4-րդ շրջանի երևանյան մրցախաղում իր հաշվին ֆուտբոլային պոկեր է ձևակերպել: Ի դեպ, այդ խաղում նա կարող էր նաև 5 գոլ խփել, եթե խաղասկզբում իրացներ 11մ հարվածը: Հենց Նշան Էրզրումյանն էլ "Շիրակի” հետ բոլոր մրցախաղերում "Արարատի” լավագույն ռմբարկուն է, որի հաշվին 10 գոլ է գրանցված: Արդյունավետ խաղով աչքի է ընկել նաև Մարկոսը` 2006-2008թթ. "Արարատում” հանդես գալիս 8 անգամ գրավելով շիրակցիների դարպասը: "Շիրակից” ամենաարդյունավետն Անդրանիկ Բարիկյանն է, ով բացարձակ լավագույն արդյունքն ունի` դառնալով 12 գոլի հեղինակ:

Հանդիպմանը չի մասնակցի 2 խաղով որակազրկված շիրակցի Կարեն Ալեքսանյանը, իսկ Տիգրան Դավթյանը ու Դամ Դիոպը վնասվածքներ ունեն:

"Արարատի” դարպասապահ Մարտիկ Մկրտումյանը որակազրկումից հետո կրկին հնարավորություն կունենա պաշտպանելու թիմի դարպասը: