"ՈՒԼԻՍ”-"ՇԻՐԱԿ”  29 խաղ, +15=6-8, 34:21

21 ապրիլի, ժ.16:00, Երևան, ֆուտբոլի ակադեմիայի մարզադաշտ

Եթե "Ուլիսի” համար առաջնությունը վաղուց կարելի է ավարտված համարել, ապա "Շիրակի” համար յուրաքանչյուր խաղ իսկապես ոսկու արժեք ունի: "Շիրակն” անհաջող սկսեց առաջնության գարնանային հատվածը` 2 հանդիպումներում վաստակելով ընդամենը 1 միավոր: Իսկ ահա հաջորդ 3 խաղերում առաջնության միանձնյա առաջատարը 7 միավոր գրանցեց իր օգտին:

Բացի այդ էլ գյումրեցիները շարունակեցին հաջող մրցելույթները գավաթի մրցաշարում և 3-րդ տարին անընդմեջ եզրափակիչի ուղեգիր նվաճեցին:

Ապրիլի 7-ին Իջևանում կայացած մրցակիցների առաջին շրջանի խաղում հաջողությունն ուղեկցեց "Շիրակին”, որին հաղթանակ պարգևեց Անդրանիկ Բարիկյանի 11մ հարվածով խփած միակ գոլը: Հոգեբանական առումով այդ հաղթանակը շատ կարևոր էր շիրակցիների համար, քանի որ "Ուլիսի” հետ ՀՀ առաջնություններում անցկացրած նախորդ 15 հանդիպումներում չէին կարողացել գոնե մեկ անգամ պարտության մատնել մրցակցին: "Ուլիսը” տոնել էր 10 հաղթանակ, 5 խաղում գրանցվել էր ոչ-ոքի: Հենց այդ ժամանակահատվածում էլ "Ուլիսը” շիրակցիների հետ դիմակայությունում զգալի առավելության հասավ: 2-րդ շրջանի երևանյան խաղում գրանցվեց ոչ-ոքի` 1:1: 3-րդ շրջանում "Շիրակն” ընթացիկ առաջնությունում 2-րդ անգամ "Ուլիսին” պարտության մատնեց սեփական հարկի տակ, այս անգամ մրցակցին հյուրընկալելով Գյումրիում:

Երևանում կայացած 4-րդ շրջանի խաղում էլ հաջողության հասան շիրակցիները` 2:0: Նրանք 2 անպատասխան գնդակ խփեցին նաև Գյումրիում կայացած մրցակիցների վերջին մրցախաղում: Այնպես որ վերջին 6 հանդիպումներում "Ուլիսը” չի կարողացել գոնե մեկ անգամ հաղթել գյումրեցիներին: Վերջին հաղթանակը "Շիրակի” նկատմամբ ուլիսցիները տոնել են անցյալ տարվա օգոստոսի 13-ին` 2:0:

 

Մրցակիցների հանդիպումներում ուլիսցիներից բոլորից արդյունավետը Գոռ Աթաբեկյանն ու Գեորգի Կրասովսկին են, որոնք 4-ական գոլ են խփել: Շիրակցիներից նույնպիսի արդյունքով լավագույն ռմբարկուն Անդրանիկ Բարիկյանն է:

 

"Շիրակն” այս խաղում կազմի հետ կապված խնդիրներ կունենա: Որակազրկման պատճառով հանդիպմանը չեն մասնակցի Արմեն Տիգրանյանն ու Սամուել Կյերեն: Վնասվածք ունի թիմի ավագ Տիգրան Դավթյանը: "Ուլիսից” 7-րդ զգուշացման պատճառով հանդիպումը բաց կթողնի Շոթա Ջիքիան: