Եվրոպա լիգայի որակավորման առաջին փուլում հայկական թիմերից հաղթանակ տոնեց միայն «Շիրակը»: Գյումրիի թիմն արտագնա խաղում 1:0 հաշվով հաջողության հասավ Մոնտենեգրոյի փոխչեմպիոն «Ռուդարի» նկատմամբ:

Մրցավեճից հետո SportArmenia-ն զրուցել է «Շիրակի» կիսապաշտպան Կարեն Մուրադյանի հետ:

-Կարեն, շնորհավոր, ինչպիսի՞ տպավորություններ են խաղից հետո:

-Շնորհակալ եմ: Խաղը դժվար ու բարդ ստացվեց: Մեկնարկում մի քիչ լարված էինք գործում, մեզ ժամանակ էր հարկավոր խաղի մեջ մտնելու համար, իսկ հետո արդեն ամեն ինչ ընկավ իր հունի մեջ, ու մեզ հաջողվեց ցուցադրել մեր ֆուտբոլը: Ամեն ինչ արեցինք հաղթանակի համար: Բայց սա դեռ միայն սկիզբն է, իսկ ամեն ինչ կորոշվի պատասխան խաղում:

-Առաջին անգամ էիր մասնակցում եվրագավաթներին, դա ավելորդ լարվածություն չէ՞ր հաղորդում:

-Այո, եվրագավաթներում սա իմ առաջին խաղն էր, բայց ոչ մի ավելորդ լարվածություն չկար: Խաղադաշտ մտնելուց ամեն ինչ մոռացվում է, և բոլոր մտքերը կենտրոնանում են միայն խաղի վրա:

-Ի՞նչ կասես մրցակցի խաղի մասին:

-Ասեմ, որ բավականին լավ թիմ էր, ֆիզիկապես լավ էին պատրաստված: Բացի այն, որ բարձրահասակ ֆուտբոլիստները շատ էին, նաև լավ խաղային որակներ ունեին:

-Քո խաղն ինչպե՞ս կգնահատես:

-Ամբողջ թիմը լավ խաղ ցուցադրեց, իսկ իմ խաղը ես չէ, որ պետք է գնահատեմ, դա կանեն մարզիչները:

-Դրվագներից մեկում դու դեղին քարտի արժանացար…

-Սահընկումով գնացի դեպի գնդակն ու մի քիչ չհասցրի, դիպա մրցակցի ոտքին: Մրցավարը նման որոշում կայացրեց…

-Պատասխան խաղին մեծ առավելությամբ եք մոտենում, որն արդեն սեփական հարկի տակ է լինելու…

-Գյումրիում մենք միշտ մեծ ոգևորությամբ ենք խաղում: Մեր երկրպագուները մեզ մեծ ուժ են հաղորդում: «Ռուդարի» համար Գյումրիում շատ դժվար կլինի: Հուսուվ եմ` այդ օրը մարզադաշտը լեփ-լեցուն կլինի: