Հայաստան – Չեխիա խաղին մնացել են հաշված ժամեր: Փորձենք հասկանալ՝ ինչ է մեզ սպասվում այսօր «Հանրապետականում»:

 

Թե՛Հայաստանի, թե՛ Չեխիայի հավաքականի խաղում առկա են ակնհայտ խնդիրներ պաշտպանությունում և հենակետային գոտում, բայց երկու թիմերն էլ ունեն հրաշալի հարձակման գիծ և ավելի շատ հակված են գրոհելու: Քանի որ արդեն անդրադարձել ենք Չեխիայի հավաքականի խաղաոճին, այդ թիմի ուժեղ և թույլ կողմերին, այժմ համառոտ անդրադարձ կատարենք մեր հավաքականին, փորձենք տեսնել ինչ խնդիրներ և հաղթաթղթեր ունենք:

 

Հայաստան

 

Մոտավոր կազմ. Բերեզովսկի, Ալեքսանյան, Արզումանյան, Ոսկանյան, Հովհաննիսյան, Մուրադյան, Մխիթարյան, Մանուչարյան, Մարկոս, Ղազարյան, Մովսիսյան:

 

Որակազրկված Հրայր Մկոյանին պաշտպանության կենտրոնում փոխարինելու է 3 անփորձ խաղացողներից (Ոսկանյան, Հարոյան, Խաչատուրով) մեկը: Ֆուտբոլասերների շրջանում կա անհանգստություն՝ կապված կենտրոնական պաշտպանի և հենակետային կիսապաշտպանի դիրքերի հետ. անփորձ, երիտասարդ խաղացողներ են: Բայց չմոռանանք, որ փորձառու չեն ծնվում, այլ դառնում են: Հաջող խաղի միակ գրավականը փորձի առկայությունը չէ: Հիշո՞ւմ եք Ռոբերտ Արզումանյանի ելույթը Հայաստան-Հոլանդիա հանդիպման ժամանակ. Եվրոպական գրանդ հավաքականի դեմ մրցավեճում անփորձ Արզումանյանը ստիպված էր փոխարինելու ոչ ավել, ոչ պակաս Հարություն Վարդանյանին: Մինչ այդ խաղը քչերն էին ճանաչում Արզումանյանին, որը հավանաբար մեծ հուզմունք էր ապրում, բայց դա չխանգարեց նրան խաղադաշտում այդ օրը լավագույններից մեկը լինել: Եվս մեկ օրինակ. Արթուր Յուսպաշյանի հիանալի խաղը Մակեդոնիայի հետ երևանյան մրցավեճում: Ոչինչ չի խանգարում կենտրոնական պաշտպանի դիրքի մեր երեք թեկնածուներին, ինչպես նաև Կարեն Մուրադյանին դառնալ նոր՝անփոխարինելի խաղացող Հայաստանի ազգային հավաքականի համար:

 

Բոլորիս անհանգստացրեց նաև Արասի վնասվածքը: Ուրախալի է, որ Օզբիլիսը միացավ թիմին և ամենայն հավանականությամբ կմասնակցի հանդիպմանը: Սակայն, դատելով Վարդան Մինասյանի՝ նախախաղյան մամուլի ասուլիսի ժամանակ հնչեցրած խոսքերից և այն հանգամանքից, որ Արասը 10 օր չի մարզվել պարզ է դառնում, որ վերջինս չի կարողանա խաղալ 90 րոպե: Այս դեպքում էլ ունենք Էդգար Մանուչարյան և Արթուր Սարկիսով, որը կարող է հաջողությամբ փոխարինել նաև ձախ եզրում հանդես եկող Գևորգ Ղազարյանին, եթե դրա կարիքը լինի:

Հենակետային կիսապաշտպանի դիրքում կխաղա Հենրիկ Մխիթարյանը: Որքան էլ պնդենք, որ դա Հենրիկի դիրքը չէ, կարծում ենք` այս խաղին Մխիթարյանը առավել օգտակար կլինի թիմին հենց հենակետային գոտում, որտեղից կկարողանա ճիշտ ուղղություն տալ թիմի գրոհներին, սրություն հաղորդել դրանց: Բացի այդ ստեղծագործելու ավելի մեծ հնարավորություն կստեղծվի Մարկոսի համար, իսկ Հենրիկի՝ մեծ ծավալի աշխատանք կատարելու ունակությունը կնվազեցնի մեր դարպասին կենտրոնից սպառնացող վտանգը:

Եզրային պաշտպանների խնդիրը: Ազգային և երիտասարդական հավաքականների միջև խաղում Կամո Հովհաննիսյանին տեսանք աջ, Վալերի Ալեքսանյանին՝ ձախ պաշտպանի գոտում: Դժվար է ասել՝ արդյոք Մինասյանը կնախընտրի այդ երկու ֆուտբոլիստներին խաղացնել նույն  դիրքերում: Կարելի է փաստել միայն, որ Կամո Հովհաննիսյանի արագությունը շատ պետք կգա Գեբրե Սելասիի անցումները զսպելու համար:

 

Ի՞նչ սպասել խաղից

 

Ունենալով բարձր որակներով օժտված եզրային պաշտպաններ և կիսապաշտպաններ՝ Չեխիայի հավաքականը միաժամանակ լուրջ խնդիրներ ունի պաշտպանության կենտրոնում, հենակետային գոտում և գրոհների եզրափակիչ փուլում: Համարձակվենք ասել, որ մեր հարձակման գիծը ավելի զորեղ է, քան մրցակցինը, դաշտի կենտրոնում ևս ակնկալում ենք որոշակի առավելություն: Հետևաբար, ամփոփելով վերոնշյալը՝ այսօր կարող ենք ակնկալել գրավիչ խաղ, բազմաթիվ գոլային պահեր՝ հետևաբար նաև գոլեր: