"ԳԱՆՁԱՍԱՐ”-"ՇԻՐԱԿ” 24 խաղ, +13=5-6, 40:20
9 մայիսի, ժ.17:00, Կապան, "Գանձասար” մարզադաշտ

Առաջնությունում հաջող հանդես եկող և մրցաշարային աղյուսակում հարևաններ հանդիսացող 2 թիմերի մրցավեճը մեծ հետաքրքրությամբ է սպասվում: Հայաստանի գավաթը նվաճած շիրակցիները վերելքով են հանդես գալիս` 2 անգամ Գյումրիում հաղթելով "Իմպուլսին”:

"Գանձասարն” ընթացիկ առաջնությունում էլ աչքի է ընկնում հուսալի պաշտպանությամբ: Առայժմ միայն "Իմպուլսին” է հաջողվել մեկ անգամ գրավել կապանցիների դարպասը: Հենց այդ գոլն էլ "Գանձասարի” միակ պարտության պատճառ դարձավ: Մնացած 4 հանդիպումներում թիմի դարպասապահ Գևորգ Պրազյանը դարպասն անառիկ է պահել:

Նախորդ տուրում Աբրահամ Խաշմանյանի սաները հաջող հանդես եկան առաջնության առաջատար "Միկայի” հետ երևանյան մրցախաղում` ստիպելով մրցակցին առաջին անգամ խաղադաշտը թողնելու պարտված:
Հայաստանի առաջնություններում կապանցիների առավելությունը շիրակցիների նկատմամբ զգալի է: Անցած մրցաշրջանում էլ "Գանձասարը” հաղթեց 3 խաղում` մրցակցին զիջելով միայն 4-րդ շրջանի խաղում:

Կապանում կայացած առաջին շրջանի խաղի ելքը վճռեց 10-րդ րոպեին Արթուր Քոչարյանի խփած միակ գոլը: Իջևանում էլ հաջողությունն ուղեկցեց "Գանձասարին”: Այս անգամ կապանցիները հաղթեցին 2:0 հաշվով Վլադիմիր Մատիչի և Արթուր Քոչարյանի խփած գոլերի շնորհիվ: 3-րդ շրջանի կապանյան մրցախաղում էլ շիրակցիներին չհաջողվեց գտնել մրցակցի դարպասի բանալին: Փոխարենն Իգոր Լոգվինովը ստիպված էր 4 անգամ գնդակը հանել ցանցից: Առաջին խաղակեսում Գորան Օբրադովիչն ու Գուստավո Դոս Սանթոսը գրավեցին "Շիրակի” դարպասը:

Ընդմիջումից հետո աչքի ընկան Վլադիմիր Մատիչն ու Արսեն Ավետիսյանը: 
4-րդ շրջանի հանդիպումից առաջ մրցակիցների միջև կայացած վերջին 8 մրցախաղերում "Շիրակին” չէր հաջողվել հաղթել "Գանձասարին”` միայն մեկ խաղ ավարտելով ոչ-ոքի (3:3): Վերջին հաղթանակը կապանցիների նկատմամբ գրանցվել էր 2009թ. սեպտեմբերի 12-ին Գյումրիում (2:1): Եվ ահա "Շիրակին” վերջապես հաջողվեց ընդհատել տխուր ավանդույթը: Հոկտեմբերի 2-ին Իջևանում կայացած խաղի ելքը վճռեց շիրակցի Դավիթ Հակոբյանի խփած միակ գնդակը: Այդ խաղի արդյունքը չեղյալ համարվեց և "Շիրակին” 3:0 հաշվով տեխնիկական հաղթանակ շնորհվեց, քանի որ "Գանձասարն” արձանագրությունում հայտավորել էր որակազրկված ֆուտբոլիստի:

Մրցակիցների հանդիպումներում սեփական դաշտի գործոնը մեծ դեր է խաղացել: Կապանում շիրակցիներին առայժմ չի հաջողվել հաղթանակ տոնել: 9 խաղ ավարտվել է "Գանձասարի” հաղթանակով, 3-ում գրանցվել է ոչ-ոքի: Գյումրիում էլ մինչև 2010թ. առաջնությունը հաջողությունն ուղեկցել էր միայն "Շիրակին”, որը 5 հանդիպում շահել էր միևնույն 2:1 հաշվով, 2 խաղում էլ դարպասները մնացել էին անառիկ: Իսկ ահա 2008թ. օգոստոսի 10-ին չեզոք դաշտում` Աշտարակում կայացած խաղում ("Շիրակի” խաղադաշտը 3 խաղով որակազրկված էր) կապանցիները հաղթել են 3:0 հաշվով: Դա մրցակիցների հանդիպումներում գրանցված խոշոր հաշվով անդրանիկ հաղթանակն էր: Նույնպիսի հաշվով գանձասարցիները հաղթել են նաև Կապանում 2008թ. առաջնության 4-րդ շրջանում: Խոշոր հաշվով 3-րդ հաղթանակը կապանցիների օգտին գրանցվել է 2009թ. մրցաշրջանի ավարտական տուրում (4:1): Կապանում կայացած այդ խաղում Արսեն Ավետիսյանը հեթ տրիկի հեղինակ դարձավ: Մինչ այդ, 2007թ. 3-րդ շրջանի խաղում Կապանում նման հաջողության էր հասել Արթուր Քոչարյանը:

2010թ. մրցաշրջանում "Գանձասարին” վերջապես հաջողվեց Գյումրիում ևս առավելության հասնել շիրակցիների նկատմամբ` հաղթելով 2 հանդիպումներում էլ (1:0, 2:0): Ընդհանուր առմամբ կապանցիները գյումրեցիների նկատմամբ 4 անգամ են առավելության հասել հյուրընկալվելիս: 

Մրցակիցների մրցավեճում բոլորից արդյունավետ են գործել "Գանձասարի” նախկին վետերաններ Արթուր Քոչարյանն ու Արսեն Ավետիսյանը` խփելով համապատասխանաբար 9 և 7 գնդակ: Գյումրեցիներից 4 անգամ մրցակցի դարպասը գրավել է Արա Մկրտչյանը:

"Շիրակի” կազմում հանդիպմանը չի մասնակցի նախորդ խաղում դաշտից հեռացված Գևորգ Հովհաննիսյանը: Վնասվածքի պատճառով կբացակայեն Դամե Դիոպն ու "Շիրակի” ավագ Տիգրան Դավթյանը: Փոխարենը որակազրկման ժամկետը լրանալուց հետո իրենց թիմակիցներին կրկին կարող են օգնել փորձառու Կարեն Ալեքսանյանն ու Անդրանիկ Բարիկյանը:

17:00-ից fc-shirak.do.am-ում հետևեք խաղի ուղիղ տեքստային ռեպորտաժին: