«Շիրակի» կոտդիվուարցի կենտրոնական պաշտպան Դիդյե Բորիսը Հայաստանի բարձրագույն խմբի առաջնության 10-րդ տուրի «Ուլիսի» հետ հանդիպումից հետո (1:1), որտեղ նա դարձավ գյումրեցիների միակ գոլի հեղինակ, ակումբի պաշտոնական կայքի հետ զրույցում խոսեց խաղից եւ թիմում տիրող մթնոլորտից.

- Շատ լավ հանդիպում ստացվեց, մենք բավական մեծ աշխատանք կատարեցինք պաշտպանությունում, իսկ բաց թողաց գոլն ուղղակի զգոնության պակաս էր: Լավ հանդիպում էր նաեւ նրա համար, որ ես իմ առաջին գոլը խփեցի «Շիրակի» կազմում:

- Դա մարզչական առաջադրա՞նք էր, որպեսզի դու պաշտպանությունից անցնես հարձակման:

- Ոչ, այդպիսի առաջադրանք ես չեմ ստացել, այդ պահին այդպես ստացվեց, ես տեսա, որ կկարողանամ  հարված կատարել եւ, ինչպես ասում են, ճիշտ ժամանակին , ճիշտ տեղում հայտնվեցի (ժպտում է):

- Ինչպե՞ս ես համագործակցում պաշտպանության  կենտրոնում Գեւորգ Հովհաննիսյանի հետ:

- Գեւորգը շատ լավ պաշտպան է, նա հիանալի է կողմորոշվում, մենք շատ մտերիմ ընկերներ ենք եւ նույնիսկ կես խոսքից, մի հայացքից միմյանց հասկանում ենք: Կարծում եմ մեր համագործակցության արդյունքը բոլորն էլ տեսնում են:

- «Շիրակի» գրեթե բոլոր հանդիպումներում դու ճանաչվում ես լավագույն խաղացող, ի՞նչն է քեզ ուժ տալիս այդպես կայուն խաղ ցուցադրել:

- Իմ մեջ շատ է մարտիկի ոգին, ես պարտվել չեմ սիրում, ցանկացած հանդիպման ես ձգտում եմ ցույց տալ իմ լավագույն կողմերը: Ես ոչ մի հանդիպման ջանք չեմ խնայում, որպեսզի իմ թիմը հասնի դրական արդյունքի: Այդպես արել եմ եւ շարունակելու եմ այդ ոգով:

- Քո կարծիքով ի՞նչն է պակասում մեր թիմին:

- Եթե խոսքը գնում է խաղային դրվակների մասին, ապա կասեմ, որ հարձակման մեջ եզրափակիչ մասը չի ստացվում, այն էլ համոզվաց եմ, որ կամաց-կամաց դա էլ կշտկվի: Իսկ եթե խաղից դուրս, ապա մեզ պետք է զարգացնել թիմային ոգին, մենք պետք է միասնական ուժ լինենք: Մենք պետք է շատ աշխատենք մարզումների ժամանակ, ջանք չխնայենք, քանի որ պետք է հասկանանք, որ այս տարի մենք կարող ենք հրաշքներ գործել, եւ ես հավատում եմ դրան:

- Իսկ ի՞նչ կասես մեր երկրպագուների մասին:

- Նրանք ուղղակի ֆանտաստիկ են: Նրանք են ամեն հանդիպման ինձ եւ բոլորին ուժ տալիս՝ պայքարելու եւ հաղթելու: Նրանք չեն դադարում երգել նույնիսկ այն ժամանակ, երբ մենք պարտվում ենք: Նրանք իսկական երկրպագուներ են, ես շատ շնորհակալ եմ նրանցից եւ շատ սիրում եմ բոլորին: