Գյումրու «Շիրակի» երիտասարդ կիսապաշտպան, 19-ամյա Դավիթ Հակոբյանը մայիսի 22-ի վաղ առավոտյան Հայաստանի մինչեւ 19 տարեկանների հավաքականի կազմում կմեկնի Իտալիա՝ մասնակցելու Եվրոպայի մինչեւ 19 տարեկանների առաջնության «Էլիտ ռաունդին»: Նշենք, որ մեր հավաքանի հետ մեկ խմբում ընդգրկված են Իսպանիայի, Իտալիայի եւ Բելգիայի հավաքականները: Մեկնելուց առաջ Դավիթն ակումբի պաշտոնական կայքի հետ զրույցում խոսեց գալիք մրցաշարից:

- Այս անգամ մեր մրցակիցները շատ ուժեղ են: Բոլորի խաղերն էլ դիտել ենք, սակայն կարող եմ առանձնացնել Իսպանիայի հավաքականին, որոնք ուղղակի ֆանտաստիկ ֆուտբոլ են ցուցադրում: Նրանց խաղաոճը չի տարբերվում Իսպանիայի ազգային հավաքականի խաղաոճից: Իրենց հետ մենք մրցելու ենք մրցաշարի հենց առաջին օրը, շատ ծանր հանդիպում է սպասվում:

- Ինչպիսի՞ մարտավարություն է ընտրել մարզիչը այդպիսի զորեղ հակառակորդի դեմ խաղում:

-  Չեմ կարող ասել, դրա մասին միայն մարզիչները գիտեն: Իսկ մեզ հայտնի կդառնա կամ խաղերի օրերին, կամ էլ մի օր առաջ:  Սակայն կարծում եմ, որ ամեն թիմի հետ տարբեր մարտավարություն կլինի, քանի որ նրանք տարբեր ոճի ֆուտբոլ են ցուցադրում:

-  Այս մրցաշարի նախորդ տուրում, որը կայացավ Հայաստանում,  դու մեկ հանդիպում խաղացիր կիսապաշտպանի, ապա հարձակվողի դիրքում: Այս անգամ, ո՞ր դիրքում ես խաղալու:

- Այո, նախորդ մրցաշարում ես մի քանի դիրքում հանդես եկա: Հիմա էլ չգիտեմ, թե հստակ, որ դիրքում եմ հանդես գալու, կարծում եմ, կրկին հանդես կգամ հարձակվողի դիրքում:

- Ինչպե՞ս է անցնում նախապատրաստական փուլը:

- Մենք մայիսի 16-ից Ավանի ֆուտբոլի ակադեմիայում անցկացնում ենք ուսումնամարզական հավաք: Բոլորն էլ ջանք չենք խնայում մարզումների ժամանակ: Ամեն ինչ բնականոն հունով է ընթանում:

- Իսկ թիմում տրամադրությունն ինչպիսի՞ն է:

- Բոլորս էլ մարտական ենք տրամադրված: Գնում ենք հաղթանակի ետեւից: