"ԲԱՆԱՆՑ”-"ՇԻՐԱԿ”  44 խաղ, +25=12-7, 89:33
16 ապրիլի, ժ. 16:00, Երևան, "Բանանց-1” մարզադաշտ

Հայաստանի առաջնության 4-րդ տուրի վերջին հանդիպումը կկայանա այսօր: 16:00-ից կարող եք հետևել հանդիպման ուղիղ տեքստային ռեպորտաժին:

Առաջնության մեկնարկային 2 հանդիպումներից հետո "Շիրակն” առաջատարներից մեկն է` հաղթելով "Արարատին” (2:1) և "Ուլիսին” (1:0):

Բացի այդ թիմը հաջող հանդես եկավ նաև գավաթի մրցաշարում` 2-րդ տարին անընդմեջ մտնելով եզրափակիչ: Իսկ "Բանանցը” մեկ միավորով հետնապահների շարքում է: Գուցե "Շիրակին” հաջողվի վերջապես խախտել "Բանանցի” հետ հանդիպումների տխուր վիճակագրությունը: Բանն այն է, որ վերջին 8 տարիներին "Բանանցը” "Շիրակի” համար դարձել է ամենաանհարմար մրցակիցը: Արդեն 33 խաղ է, ինչ "Շիրակին” չի հաջողվում հաղթել "Բանանցին”` այդ հանդիպումներից միայն 10-ն ավարտելով ոչ-ոքի: Վերջին անգամ գյումրեցիները "Բանանցին” հաղթել են 2003թ. ապրիլի 26-ին Երևանում կայացած խաղում: Հանդիպման ելքը վճռել էր 10-րդ րոպեին Արարատ Հարությունյանի խփած միակ գնդակը:

Ընդ որում 2005-2008թթ. շիրակցիները չափազանց անհաջող են հանդես եկել Երևանում` պարտվելով բոլոր 7 հանդիպումներում` այդպես էլ չգտնելով մրցակցի դարպասի բանալին, փոխարենը սեփական դարպասը բաց թողնելով 20 գնդակ: Մինչդեռ 1992-2002թթ. առավելությունը շիրակցիների կողմն էր, որոնք տոնել էին 6 հաղթանակ, 2 խաղ ավարտել էին ոչ-ոքի, կրել էին 2 պարտություն: Ընդ որում Գյումրիում կայացած բոլոր 5 խաղերն էլ շահել էր "Շիրակը”: 1994թ. գյումրեցիները Երևանում առաջին հաղթանակը տոնեցին "Բանանցի” նկատմամբ Արթուր Պետրոսյանի խփած միակ գոլի շնորհիվ: Իսկ Գյումրիում "Բանանցն” անդրանիկ հաղթանակը (2:1) տոնել է 2003թ. հուլիսի 5-ին: "Բանանցից” աչքի ընկան Արամ և Արա Հակոբյանները, "Շիրակից” միակ գոլը խփեց Կարեն Ալեքսանյանը:

Ճիշտ է, նախորդ առաջնությունում "Բանանցին” միայն 3-րդ շրջանում  հաջողվեց հաղթել "Շիրակին”: Առաջին շրջանում "Հանրապետական” մարզադաշտում կայացած խաղում գրանցվեց մարտական ոչ-ոքի` 2:2: Ընդ որում "Բանանցը” խաղը շահում էր 2:0 հաշվով: 18-րդ րոպեին հաշիվը բացել էր Վալտեր Պողոսյանը, երկրորդ խաղակեսի սկզբում Բրունո Կորեան 2-րդ անգամ էր գրավել Իգոր Լոգվինովի պաշտպանած դարպասը: Շիրակցիներին հաջողվեց փրկել խաղը` ընդամենը 3 րոպեում վերականգնելով հավասարակշռությունը: 75-րդ րոպեին աչքի ընկավ Կարեն Ն. Խաչատրյանը, իսկ 3 րոպե անց Անդրանիկ Բարիկյանը 11մ հարվածով "Շիրակին” փրկեց պարտությունից:

Իջևանում կայացած խաղում կրկին գրանցվեց ոչ-ոքի: Այս անգամ առաջինը հաջողության հասան գյումրեցիները: Հաշիվը 66-րդ րոպեին բացեց Կարեն Ն. Խաչատրյանը, 9 րոպե անց Արսեն Բալաբեկյանը վերականգնեց հավասարակշռությունը:

Եվ ահա օգոստոսի 27-ին Երևանում կայացած խաղում "Բանանցը” հաղթեց 3:1 հաշվով: Արդեն 12-րդ րոպեին Հովհաննես Համբարձումյանը գրավեց Իգոր Լոգվինովի պաշտպանած դարպասը: Ճիշտ է, 20-րդ րոպեին Դավիթ Հակոբյանը վերականգնեց հավասարակշռությունը, սակայն 4 րոպե անց Բետոն 11մ հարվածով կրկին առաջ մղեց "Բանանցին”: Իսկ առաջին խաղակեսի ավարտին Բրունո Կորեան ամրապնդեց թիմի հաղթանակը:

Առաջնության նախավերջին տուրում էլ "Բանանցին” իջևանյան խաղում հաղթանակ պարգևեցին Բրունո Կորեայի և Բետոյի խփած 2 անպատասխան գոլերը:

Մրցակիցների մրցավեճում բոլորից արդյունավետ են գործել "Բանանցի” հարձակվողներ Արամ Հակոբյանն ու Արսեն Բալաբեկյանը` խփելով 8-ական գնդակ: Շիրակցիներից լավագույն արդյունքն ունի Անդրանիկ Բարիկյանը, ով խփել է 4 գնդակ: