Կարճ ժամանակով Գյումրիում էր գտնվում Հայաստանի հավաքականի նախկին խաղացող Արթուր Պետրոսյանը, ով ներկա գտնվեց ապրիլի 29-ին կայացած գավաթի եզրափակիչ «Շիրակ»-«Իմպուլս» (1:0) հանդիպմանը, ապա մասնակցեց երեկ կայացած 1990-ականների «Շիրակի» ու ներկայիս թիմի ընկերական հանդիպմանը:

Մինչեւ Շվեյցարիա վերադառնալը Պետրոսյանը զրուցեց armsport.am-ի հետ:

- Արթուր, երկարատև ընդմիջումից հետո «Շիրակի» կազմում 1990-ականներին ելույթ ունեցած ֆուտբոլիստներով այսօր կրկին ասպարեզ դուրս եկաք: Ի՞նչ զգացումներ ունեցար:

- Կարճ ասեմ` ուրախություն ու ոգևորություն: Այս ամենին նպաստել էր նաև այն, որ կիրակի օրը մենք գավաթի եզրափակչի ժամանակ իսկական տոն տեսանք: Ոգևորված ժողովուրդ, մեծ ուրախություն, դհոլ ու զուռնա… Այս ամենը կար 1990-ականներին: Հրաշալի էր նույն այդ ոգևորությունն այսօր մարդկանց աչքերում տեսնելը:

- Վաղո՞ւց չէիր եղել Գյումրիում:

- Նախորդ այցելությունս եղել էր 2 տարի առաջ: Այս ընթացքում որոշ փոփոխություններ քաղաքում եղել են, սակայն կտրուկ փոփոխություններ չնկատեցի:

- Վետերանների կազմում մրցեցիր ներկայիս «Շիրակի» դեմ ու թերևս ավելի հստակ կարծիք ես կազմել թիմի մասին:

- Առաջին հերթին պետք է նշել, որ երիտասարդ թիմ է, չնայած որ կան նաև փորձառու խաղացողներ: Եզրափակիչում առկա մթնոլորտի մասին խոսեցի, բայց պետք է ասեմ, որ 1990-ականները հիշեցի` նաև տղաների նպատակաուղղվածությունը տեսնելով: Տեսա գյումրեցու թասիբը նրանց մեջ: Դա շատ ուրախալի փաստ էր ինձ համար: Թասիբով ֆուտբոլ խաղալն ավանդույթ է մեզ համար: Հուսով եմ, որ երիտասարդներն անպայման առաջընթաց են ունենալու:

- Լինելով «Ցյուրիխի» մինչեւ 18 տարեկանների գլխավոր մարզիչը ու շատ լավ ծանոթ լինելով եվրոպական ֆուտբոլի ենթակառուցվածներին` ի՞նչ կարող ես ասել Գյումրիում այդ ուղղությամբ տարվող աշխատանքներին:

- Վերանորոգված մարզադաշտի մասին արդեն շատ է խոսվել: Տեղյակ եմ նաև, որ քաղաքում ֆուտբոլային ակադեմիա է շահագործման հանձնվելու, ինչը մեծ խթան կարող է հանդիսանալ Գյումրիում ֆուտբոլի զարգացման համար: Գավաթի եզրափակիչում ունեցած հաղթանակից հետո ֆուտբոլով զբաղվող երեխաների թիվն էլ ավելի է մեծանալու, իսկ ակադեմիան պատրաստ լինելու դեպքում արդեն այդ հնարավորությունը կստեղծի:

- «Շիրակի» մարզչական շտաբի ու ներկայացուցիչների հետ գործնական շփումներ կա՞ն` միտված ակումբի զարգացմանը:

- Մարզիչների հետ միշտ էլ մտքափոխանակություն լինում է, բայց ոչ ավելին: Ես այնպիսի բնավորություն ունեմ, որ խորհուրդներ տալ չեմ սիրում: Ակումբն ունի լավ մարզչական շտաբ, ընթանում է ճիշտ ուղով ու կշարունակի զարգանալ: