Հայաստանի գավաթի եզրափակիչ «Շիրակ»-«Իմպուլս» (1:0) խաղին ներկա էր Գյումրու ֆուտբոլի ամենավառ անհատականություններից մեկը` Արթուր Պետրոսյանը, ով մինչ օրս էլ խփած 11 գնդակներով հանդիսանում է Հայաստանի հավաքականի լավագույն ռմբարկուն:

Ներկայումս Շվեյցարիայի «Ցյուրիխում» մարզչական գործունեություն իրականացնող Արթուր Պետրոսյանը «Շիրակի» նախագահի հրավերով ժամանել էր Գյումրի` իր նախկին թիմի հանդիպմանը հետևելու համար: Խաղից հետո armsport.am-ը կարճ զրույց ունեցավ Պետրոսյանի հետ:

- Արթուր, հաճելի է Ձեզ տեսնել Հայաստանում: Անկասկած եզրափակչի արդյունքը ձեր սրտով էր: Ի՞նչ կասեք խաղի մասին:

- Հանդիպումը հետաքրքիր ու գրավիչ պայքարում ընթացավ: «Շիրակը» հիանալի հանդիպում անցկացրեց ու միանգամայն արժանի էր հաղթանակի:

- Որպես գյումրեցի խաղացող, ով իր կարիերան սկսել է Գյումրիում, հանդես եկել «Շիրակում», ի՞նչ կարող եք ասել մարզադաշտում եղած մթնոլորտի մասին:

- Իրականում շատ է ոգեշնչում այս մթնոլորտը: Շատ հաճելի է ժողովրդին այսպես ուրախ տեսնել: Այսօրվա խաղն ինձ հիշեցրեց 1990-ականները, երբ մարզադաշտը լեփ-լեցուն էր: Ես վստահ եմ, որ վերանորոգված մարզադաշտն ու բոլոր այն քայլերը, որոնք կատարվում են այսօր, խթան կհանդիսանան Գյումրիում ու ողջ Հայաստանում ֆուտբոլի զարգացման համար:

- Ձեր առաջիկա ծրագրերն ինչպիսի՞ն են:

- Երեքշաբթի օրը կկայանա Գյումրիի «Շիրակի» վետերանների ու ներկայիս կազմի հանդիպումը, որին կմասնակցեմ նաև ես: Այդ խաղից հետո կմեկնեմ Շվեյցարիա:

Եզրափակչի տեսանյութը կարող եք դիտել այստեղ: