Գյումրիի «Շիրակը», երկարատև ընդմիջումից հետո, կրկին նվաճեց Հայաստանի չեմպիոնի կոչումը: Գյումրեցիների լավագույն ռմբարկուներից մեկը` Անդրանիկ Բարիկյանը, Հայաստանի առաջնության 40-րդ տուրի՝ «Փյունիկի» հետ հաղթական ու ոսկեբեր խաղից (1:0) հետո պատասխանել է armsport.am-ի հարցերին:

- Սպասո՞ւմ էիք, որ առաջնության ավարտից 2 տուր առաջ անհասանելի կդառնաք «Միկայի» համար:

- Ձմեռային արձակուրդներից հետո մեր առավելությունը «Միկայի» նկատմամբ որոշակիորեն ավելացավ, բայց մենք ոչ մի վայրկյան չէինք կորցրել զգոնությունը և պատրաստ էինք մինչև վերջին տուրերը պայքարել չեմպիոնության համար: Իհարկե, այժմ ուրախ ենք, որ ապահովել ենք առաջին տեղը, սակայն վերջին 2 տուրերում էլ խաղալու ենք հաղթանակի համար: Առավել ևս, որ հաջորդ տուրում հանդես ենք գալիս Գյումրիում, որտեղ մեզ կաջակցեն մեծ թվով ֆուտբոլասերներ:

- 40-րդ տուրում աղյուսակը եզրափակող «Բանանցը» հաղթեց «Միկային»: Ինչպե՞ս ընդունեցին այս լուրը «Շիրակի» խաղացողները:

- Եթե նույնիսկ «Միկան» չպարտվեր և ոչ-ոքի ավարտեր խաղը, մինևնույն է՝ «Փյունիկին» հաղթելով՝ մենք չեմպիոն էինք դառնում: Այնպես որ, տարբերություն չկար պարտվել է «Միկան» թե ոչ ոքի է խաղացել։ Իսկ, ահա՛, «Բանանցի» պարտության դեպքում՝ պայքարը շարունակվելու էր: Ինձ համար անսպասելի չէր, որ «Միկան» պարտվեց, քանի որ «Բանանցը» լավ թիմ է և սեփական հարկի տակ կարող է միավորներ խլել ցանկացած թիմից: Այս առաջնությունում մենք էլ չենք կարողացել հաղթանակ տոնել՝ «Բանանցի» հարկի տակ։ Ընդհանրապես, այս առաջնությունում ակնհայտ ետնապահ կամ ետնապահներ չկան: Բոլոր թիմերն էլ ի վիճակի են հասնել հաջողության:

- Ի՞նչը օգնեց «Շիրակին»՝ դառնալ Հայաստանի 2012/13թթ. առաջնության չեմպիոն:

- Առաջնությունը սովորականից երկար էր, և պետք էր ավելի զգոն լինել, կայուն խաղ ցուցադրել: Մենք յուրաքանչյուր խաղի լրջորեն ենք պատրաստվել, մեր կողքին միշտ եղել են մեր երկրպագուները: Գյումրիի և գյումրեցի ֆուտբոլասերի համար սա մեծ ուրախություն է, քանի որ նրանք հավատում էին մեզ և երկար էին սպասել այս հաջողությանը: «Շիրակը» մեծ պատմություն ունի և միշտ փորձել է բարձր պահել քաղաքի պատիվը: Վերջին մեկ տարվա ընթացքում ունեցել ենք շատ հաղթանակներ, որոնք ավելի են բարձրացրել թիմի ոգին։ Հիշատակեմ նախորդ տարվա Գավաթը նվաճելը, Եվրոպայի լիգայի առաջին փուլի հաղթահարումը…

- Չեմպիոնի կոչումը նվաճելուց հետո «Շիրակը» ցնծության մեջ էր: Հնարավո՞ր է՝ այդ ուրախությունը խանգարի ավելի լավ պատրաստվել «Փյունիկի» հետ Գավաթի եզրափակիչ խաղին:

- Մենք տոնեցինք հաղթանակը, բայց գիտակցում ենք, որ մրցաշրջանը դեռ չի ավարտվել և իսկական տոնակատարություններ կլինեն ավելի ուշ` Գյումրիում: Մենք շատ լուրջ ենք մոտենում եզրափակչին, քանի որ ցանկանում ենք երկրորդ տարին անընդմեջ դառնալ գավաթակիր: Նախորդ տարի մենք առաջին անգամ նվաճեցինք Գավաթը: «Շիրակի» նման տիտղոսակիր թիմի թանգարանում պետք է հնարավորինս շատ Գավաթներ լինեն: Տիտղոսները երբեք քիչ չեն լինում: